Zëvendësi i ish-emisarit special të Kombeve të Bashkuara për statusin e Kosovës, Albert Rohan, ka deklaruar se gjatë bisedimeve të para ndërmjet Prishtinës dhe Beogradit nuk do të flitet për statusin e Kosovës, pasi kjo është çështje e zgjidhur, por bisedimet duhet të jenë të natyrës jo formale dhe në nivel ekspertësh.
"Këto nuk janë bisedime për statusin, kjo çështje është e zgjidhur dhe se për këtë nuk ka çka të bisedohet. Këtu është fjala për çështje që ekzistojnë ndërmjet dy fqinjëve, transporti, komunikacioni, bashkëpunimi, dogana, kontrolli i kufijve", ka thënë Rohan në një intervistë për Deutsche Welle.

Ai ka shtuar se ekziston një numër i madh i çështjeve praktike për të cilat duhet të bisedojnë Prishtina dhe Beogradi, në mënyrë që në themel të këtij bashkëpunimi praktik të mund të arrijë deri te përmirësimi i përgjithshëm i atmosferës.

"Marrim si shembull veriun e Kosovës. Këtu është shumë e rëndësishme lufta kundër kriminalitetit në kufij. Mandej, furnizimi me energji, mbrojtja e mjedisit jetësor. Për këto duhet biseduar në nivel ekspertësh, pasi që për gjëra të tilla nuk bisedojnë presidentët e shteteve ose shefat e qeverive, por ekspertët", citon RTV21 diplomatin austriak.

Rohan shprehet kundër ndërmjetësimit, pasi që sipas tij, të dyja vendet mund të bisedojnë për çështje praktike dhe pa ndihmën nga jashtë, por ka shtuar se Bashkimi Evropian mund të ndihmojë duke ofruar renditjen, sipas të cilës do të bisedohej për çështje praktike. Për më tepër, Rohan ka thënë se e gjithë politika e jashtme serbe me vite po lufton për Kosovën dhe se kjo betejë do të jetë e humbur.