Lideri i lëvizjes “Vetëvendosje”, Albin Kurti, tek ka formuar Këshillin për zhvillimin e qendrës së lëvizjes “Vetëvendosje” të dielën në Pejë, ka komentuar edhe ceremoninë e inaugurimit të patriarkut serb Irinej.
“Mendoj se ajo që po ndodh sot në Patrikanën e Pejës është përgjegjësi i pushtetit të Kosovës, i cili edhe përkundër kësaj ngjarje tregohet i vetëkënaqur dhe i vetëmjaftueshëm në Prishtinë”, transmeton Koha.net fjalët e Kurtit, i cili ka kthyer vëmendjen në vitin 2005, kur ka thënë se lëvizja e prirë prej tij ishte kundër konceptit të eksterritorialitetit për kishat dhe manastiret ortodokse në Kosovë.

Sipas tij, ky qëndrim po dëshmohet edhe sot, duke pohuar se pranimi i këtij realiteti nga kasta politike e Kosovës ka krijuar mundësinë që këto territore të serbizohen tërësisht.

“Po të kishim një kastë tjetër politike, nuk do të kishim shndërrimin e kishave dhe manastireve ortodokse, që janë pasuri e përbashkët, në ambasada serbe”, është shprehur lideri i “Vetëvendosje”.

Ai ka komentuar edhe dorëheqjen Fatmir Sejdiut, duke thënë se “vendimi i Gjykatës Kushtetuese për Sejdiun ka qenë një vendim i drejtë, por jo i motivuar nga drejtësia”, duke shtuar se politika në Kosovë qëndron mbi institucionet e drejtësisë, të cilat i kyçë ose i shkyçë varësisht se si i konvenon asaj. Sipas tij, “të gjithë e kemi ditur se Sejdiu e ka shkelur Kushtetutën, mirëpo momenti i zgjedhur që këtë gjë ta thotë gjykata është moment politik”.