Kosova prezantohet në Panairin Ndërkombëtar të Librit në Frankfurt
Frankfurt
Në Frankfurt të Gjermanisë, të mërkurën është hapur Panairi Ndërkombëtar i Librit, ku në mesin e të gjitha vendeve të botës po merr pjesë edhe Republika e Kosovës. Në panair Kosova po prezantohet nga Akademia e Shkencave dhe Artëve të Kosovës, Instituti Albanologjik, Instituti i Historisë dhe shoqatat botuese AIKD, Buzuku, Dija, Drita, Dukagjini, Koha, Libri Shkollor dhe Mendimi Pozitiv. Panairi është duke u përcjell nga një ekip i Agjencisë së Lajmeve Kosovapress.
Besian Zeneli, përfaqësues i Shoqatës së Botuesve të Kosovës vlerëson se në panair janë paraqitur të paktën dhjetë nga botuesit më të mirë që ka Kosova, kurse pjesëmarrjen e Kosovës në këtë eveniment botëror e shikon si një mundësi të mirë që të njihet më mirë kultura e Kosovës.
“Pjesëmarrja në këtë panair është një mundësi shumë e mirë për lexuesin shqiptar, por edhe atë botëror, që të njihet me vlerat e kulturës, kulturën shqiptare, me autorët shqiptarë. Natyrisht se pjesëmarrja e jonë nuk do të ishte e mundur në qoftë se nuk do të hasnim në mbështetjen e Ministrisë së Kulturës dhe unë në emër të shoqatës e falënderoj përzemërsisht për mbështetjen që na kanë dhënë. Por llogorisim edhe në mbështetje të ardhshme, normal me një buxhet më të madh, po të jetë e mundur, pasi siç po shihet për rreth, jemi të rrethuar me stenda më hapësira më të mëdha”, tha Zeneli.
I riu Ilirjan Sadiu, me prejardhje nga Mitrovica e Kosovës, i cili jeton në Zvicër, ishte njëri nga vizitorët e parë që e vizitoi stenden e Kosovës, ndërsa shprehej i lumtur që edhe Kosova është pjesë e këtij panairi.
“Kam ardhur këtu prej Bazeli me klasë të vizitoj këtë panair, dhe kam pas detyrime tjera, por kam ardhë të vizitoj këtë panair. Më ranë në sy shtetet që marrin pjesë në panair, me ra në sy edhe Kosova, dhe mund të them që jam shumë krenar që edhe Kosova merr pjesë”, tha Sadiku për Kosovapress.
Pananairi edhe kësaj here, si në të kaluarën po sponsorizohet nga Ministria e kulturës, Rinisë dhe Sporteve e Republikës së Kosovës. Në stendën e Kosovës mund të gjinden botimet më të reja të shtëpive botuese që marrin pjesë në panair. Stenda e Kosovës gjendet në sallën numër 5.0 C949. Panairi Ndërkombëtar i Librit që tradicionalisht mbahet në Frankfurt, është panairi më i madh në botë./F.Bajraktari/
