Deputeti i Lidhjes Demokratike të Kosovës Fatmir Rexhepi ka kërkuar në seancën e Kuvendit që të prishet koalicioni PDK-LDK, duke thënë se kjo marrëveshje është e vdekur që në ditën e dorëheqjes së Fatmir Sejdiut nga posti i presidentit të vendit.
Ai ka kërkuar nga partia e tij që të mos vazhdojë qëndrimin në koalicion, port ë veprojë në parim me normat kushtetuese dhe t’i japë fund koalicionit, në mënyrë që të formohet një qeveri teknike.
“Që nga dita kur ka dhënë dorëheqje presidenti Sejdiu, unë personalisht e vlerësoj se marrëveshja e koalicionit është e vdekur. Është mirë që këto dy parti ta bëjnë publike këtë. Unë e ftoj LDK-në, që sa më shpejt në takimet e saj si parti të veprojë në parim me normat që t’i jep fund këtij koalicioni dhe mendoj që kjo do të ishte puna më e ndershme, në mënyrë që vendi ynë të shkojë drejt një qeverie teknike, në mënyrë që realisht të kemi një ambient më të mirë politik për zgjedhje”, ka thënë Rexhepi.
Ai ka ftuar edhe kryetarin e Kuvendit, që si ushtrues detyre i presidentit të Kosovës të bëjë përpjekje për formimin e një qeverie teknike.
Ndërkaq, Gani Buçinca, nga PDK-ja, ka konsideruar se që disa deputetë po akuzojnë presidentin dhe qeverinë për gjendjen e tyre mjerane brenda partive të tyre.
“I them opinionit që të mos bie pre e këtyre veprimeve. Çështjet e partisë vendosen në parti. Asnjë president dhe qeveri në botë nuk mund të bëjë politika, sipas individëve që janë të pakënaqur me partinë e vetë”, ka thënë Buçinca.
Ai ka ironizuar me deputetët e opozitës, të cilët kanë ngritur çështje të ndryshme, sikur që është çështja e zgjedhjeve në Rahovec dhe Prizren, duke i rekomanduar opozitës që të ketë kujdes se mund të mbetet jashtë Kuvendit me strategjinë që po ndjek.
“I pyes kolegët e opozitës, si jeni, a jeni mirë, a u qetësuat, si po ju shkon fushata? Keni kujdes se po mbeteni jashtë Kuvendit me këtë strategji”, ka thënë Buçinca, përderisa i ka dhënë mbështetje EULEX-it, KFOR-it dhe Policisë së Kosovës për veprimet e fundit në veri.
Deklarata e fundit e Buçincës ishte kundër deklaratës së deputetit të pavarur, Driton Tali, i cili ka lexuar para ligjvënësve një letër në veten e parë, duke iu drejtuar shefit në largim të EULEX-it, Iv de Kermabon.
“Të përshëndes gjeneral Kermabon dhe të falënderoj për atë që s’ke bërë asgjë gjatë mandatit tuaj. Ju gjeneral nuk bëtë asgjë, thatë se gjërat nuk mund të arrihen brenda natës, por duhet punë. Me resurset që keni pasur çka arritët? Asgjë. Më pak se hiq”, ka thënë Tali, ndërkohë që ka shfaqur shpresën se shefi i ri i EULEX-it do ta arsyetojë me punë pagën e tij në Kosovë.
Në fillim të seancës janë shtruar edhe çështje të ndryshme, sikur që është zgjidhja e problemit të 500 punëtorëve të ndërmarrjes “Llamkos”, të mbetur pa punë pas privatizimit të kësaj ndërmarrje gjatë qeverisë së kaluar.
Në seancën e sotme, ligjvënësit kanë për shqyrtim të dytë disa projektligje, mes të cilave edhe tri projektligje që lidhen me sektorin e energjisë, sikur që është Projektligji për energjinë, Projektligji për energjinë elektrike dhe ai për Rregullatorin e Energjisë.
Po ashtu, në seancën e sotme në shqyrtim të dytë është edhe Projektligji për regjistrimin e popullsisë, ekonomive familjare dhe banesave./B.Lani/