Situata politike në Kosovë dhe progresi që ka shënuar Republika e Kosovës në realizimin e procesit të decentralizimit, ishin temë diskutimi mes ministrit të Administrimit të Pushtetit Lokal, Sadri Ferati gjatë takimit me drejtorin për Ballkanin Perëndimor, Pier Mirel, në Bruksel.

Me këtë rast, drejtori për Ballkanin Perëndimor, Mirel vlerësoi lart realizimin e procesit të decentralizimit në Kosovë, duke thënë se suksesi i decentralizimit është matur nga pjesëmarrja e serbëve në zgjedhjet lokale dhe mbështetja që i është ofruar komunave të reja nga niveli qendror.

Mirel ka thënë se është e rëndësishme që ky sukses të shërbejë si shembull edhe për veriun e Kosovës.

Duke iu referuar respektimit të të drejtave të komuniteteve në Kosovë, ministri Ferati ka thënë se me Kushtetutën e vendit dhe ligjet e miratuara konform standardeve ndërkombëtare, Kosova ka ofruar mundësi për jetë të barabartë për të gjithë qytetarët e saj.

“Zgjedhjet e suksesshme, ndërtimi i shpejtë i administratave në komunat e reja dhe mbështetja që ka ofruar Qeveria e Kosovës për komunat, janë argumente që tregojnë se procesi i decentralizimit po shënon progres në të gjitha fazat e implementimit”, tha Ferati duke shtuar se të drejtat e komuniteteve në Kosovë janë më të avancuarat në rajon.

Në takim është biseduar edhe për situatën në veri të Kosovës, me ç’rast u tha se aty ku kanë pasur qasje institucionet e Kosovës, tani qytetarët serbë janë të integruar dhe jetojnë të lirë sikur gjithë qytetarët tjerë.