Zyrtarët nga Aleanca Kosova e Re (AKR), e kanë fajësuar koalicionin aktual qeverisës për dështime në realizimin e premtimeve të dhëna qytetarëve të Kosovës dhe tash së fundi për krizën politike të shkaktuar në vend, si dhe për situatën e tensionuar e të brishtë të sigurisë në pjesën veriore të Kosovës.

Në një konferencë për media të AKR-së, këshilltari për politikë dhe siguri nacionale i liderit të kësaj partie, Shefki Abdullahu tha se fajtor për krijimin e krizës është dështimi sistematik i bashkëqeverisjes nga dy subjektet më të mëdha politike në vend.

Abdullahu: Qeveria e koalicionit ka dështuar
(Video)
“AKR-ja konstaton se fajtor kryesor për një gjendje të tillë, është dështimi sistematik i bashkëqeverisjes aktuale të dy subjekteve më të mëdha politike në vend. Deri më tani, e gjithë kjo tregon qartë, se Qeveria e koalicionit në fjalë nga momenti i marrjes se pushtetit, dështoi në realizimin e premtimeve të dhëna qytetarëve të Kosovës, e madje nuk plotësoi as kërkesat më elementare të tyre”, ka thënë ai.

Ai vlerësoi se siguria në vend është e qëndrueshme, kurse në veri të Mitrovicës vazhdon të jetë e brishtë dhe pjesërisht e kontrolluar nga institucionet relevante vendore dhe ndërkombëtare edhe pse ditëve të fundit, aksionet e përbashkëta të SHPK-së dhe EULEX-it në mbështetje të plotë të KFOR-it, janë inkurajuese

Në emër të AKR-së, këshilltari Abdullahu edhe ka kërkuar koordinim veprimesh të institucioneve relevante në bazë të përgjegjësive që kanë dhe të ndërmarrin hapa konkret në fushat specifike, siç janë intensifikimi i luftës kundër krimit të organizuar dhe korrupsionit dhe rikthimin e sundimit të plotë të rendit dhe ligjit dhe kontrollin e plotë kushtetues në tërë territorin e Kosovës, posaçërisht në veri të Kosovës.

Abdullahu: Koordinimet të jenë të përbashkëta
(Video)
“Aleanca Kosova e Re duke marrë parasysh situatën aktuale politike, kërkon nga institucionet e Republikës së Kosovës një bashkëpunim të plotë me institucionet ndërkombëtare të akredituara në Kosovë, të koordinojnë veprimet e përbashkëta përmes institucioneve relevante në bazë të përgjegjësive që kanë dhe të ndërmarrin hapa konkret në fushat specifike”, është shprehur Abdulahu.

Ndërkohë sa u përket bisedimeve ndërmjet Prishtinës dhe Beogradit, sipas AKR-së ato më mirë është të zhvillohen pas përfundimit të zgjedhjeve të parakohshme në Kosovë dhe konstituimit të institucioneve të reja./B.Brahaj/