Prishtinë, 12 tetor – Gjyqtari i EULEX-it, Klaus Jung, ka bërë shkelje të ligjit me rastin e arrestimit dhe caktimit të paraburgimit për vëllezërit Vuloviq nga Leposaviqi. Vlerësimin për këto shkelje e kanë dhënë tre gjyqtarë të tjerë të EULEX-it të mbledhur në një panel gjyqësor, të cilët kanë shqyrtuar ankesën e mbrojtjes për caktimin e paraburgimit, përkatësisht masës së paraqitjes në polici për dy vëllezërit.
Ky kolegj ka gjetur shkelje procedurale të gjyqtarit të procedurës paraprake të Gjykatës së Qarkut në Mitrovicë, Klaus Jung, dhe të prokurorit Antorio Pastore, duke anuluar vendimin e këtij gjyqtari.
Paneli gjyqësor prej tre gjyqtarësh të Gjykatës së Qarkut në Mitrovicë është mbledhur më 8, përkatësisht 9 tetor 2010, dhe ka nxjerrë dy vendime lidhur me rastet kundër vëllezërve Vuloviq. Në shqyrtimin e parë të premten paneli ka anuluar vendimin e gjyqtarit të procedurës paraprake që Dejan Vuloviq të paraqitet dy herë në javë në polici, ndërsa të shtunën ky panel ka anuluar vendimin e paraburgimit të caktuar nga gjykatësi i procedurës paraprake ndaj Sërgjan Vuloviqit, meqenëse, sipas panelit, në të dyja rastet gjykatësit të procedurës paraprake të EULEX-it i mungonte juridiksioni për të vendosur mbi veprat penale për të cilat dyshohen dy serbët.
Megjithatë dy vëllezërit Vuloviq nga Leshaku i Leposaviqit me gjasë nuk do të ndahen lehtë me EULEX-in. Prokuroria Speciale ka nisur hetimet ndaj tyre për krim të organizuar, vetëm katër përkatësisht dy ditë pas arrestimit të tyre, për vepra krejtësisht të tjera penale.

Më 4 tetor Policia e EULEX-it kishte arrestuar Dejan Vuloviqin në veri të Kosovës nën dyshimin për tentativë vrasjeje, posedim të paautorizuar të armëve dhe shkaktim të rrezikut të përgjithshëm. Ai u lirua nga arresti një ditë më vonë, por gjyqtari i procedurës paraprake kishte vendosur që serbi i dyshuar të paraqitej në Stacionin e policisë në Leposaviq dy herë në javë, si dhe të konfiskohej pasaporta e tij.
Më 6 tetor ndërkaq policët e Departamentit Ekzekutiv të Policisë së EULEX-it arrestuan Sërgjan Vuloviqin nën dyshimin se ka kërcënuar një zyrtar policor, posedim të paautorizuar të armëve dhe pengim të personave zyrtarë në kryerjen e detyrave zyrtare. Për këto dyshime gjyqtari i procedurës paraprake kishte urdhëruar paraburgimin e tij për 15 ditë.
Zyrtarët e EULEX-it nuk kanë dhënë shumë sqarime për këto shkelje, por kanë thënë se ata mbesin të dyshuar edhe më tej.
Zëdhënësi i këtij misioni, Blerim Krasniqi, ka thënë se anulimi i vendimit të gjyqtarit Jung ishte thjesht teknik mbi procedurat dhe jo mbi përmbajtjen e provave (më gjerësisht në numrin e sotshëm të “Kohës Ditore”).Faleminderit për rekomandimin