Hagë, 18 tetor – Bëhet e ditur se Tribunali i Hagës ka refuzuar kërkesën e Hajredin Balaj për lirim të përkohshëm nga burgu. “Dhuna e brendshme, e pafrenuar dhe e pashfaqur që mban Balaj në vete, paraqet rrezik për shoqërinë”, thekson Tribunali në arsyetim.

“Balaj është dënuar me 13 vjet burg për torturë dhe vrasje të 11 të zënëve rob në një kamp në Llapushnik në vitin 1998.

Tribunali në nëntor të vitit 2005 e dënoi atë për pjesëmarrje në vrasjen e 11 të burgosurëve, kryesisht shqiptarë, në kampin e UÇK-së në Llapushnik, si dhe për shkak të trajtimit të vrazhdë dhe torturimit të të paraburgosurve të tjerë kryesisht serbë, citojnë mediet njoftimin e Tribunalit.

Dy vjet më vonë, në shtator të vitit 2007, aktgjykimin e Tribunalit e konfirmoi Kolegji i Apelit i Tribunalit, duke refuzuar ankesën e Balajt, i cili pas kësaj u dërguar për vuajtje të dënimit të mëtejshëm në Francë.

Në arsyetimin e vendimit të kryetarit të Tribunalit, Patrick Robinson, theksohet se sipas rregullave të gjykatës, i dënuari ka të drejtë për lirim të parakohshëm pasi të vuajë dy të tretat e dënimit. Gjykatësi Robinson ka vlerësuar se Balaj, sipas raporteve të autoriteteve franceze, nuk ka dhënë shenja se është përmirësuar gjatë vuajtjes së dënimit. Ai në vendim citon se në bisedë me psikologun francez “Balaj ka manifestuar mohimin dhe refuzimin të marrë përgjegjësitë për veprat e veta”.

“Ai mohon çfarëdo përzierje në veprat për të cilat është dënuar. Por ai pranon dënimin...që ia atribuon ‘politikës’ sipas të cilës dikush duhet të bëhet viktimë për qëllime më të larta të paqes”, konkludon psikologu francez mbi Balajn.

Po sipas këtyre gjetjeve, në të cilat mbështetet kryetari i Tribunalit, “dhuna e brendshme, e pafrenuar dhe e pashfaqur që mban Balaj në vete, paraqet rrezik për shoqërinë”.

Balajn e kanë arrestuar dhe ia kanë dorëzuar Tribunalit forcat ndërkombëtare në Kosovë në shkurt të vitit 2003. Në Hagë ai u gjykua bashkë me Fatmir Limajn e Isak Musliun, të cilët u liruan nga fajësia për krimet në kampin e Llapushnikut.