Prishtinë, 19 tetor - Ushtruesi i detyrës së presidentit të vendit dhe njëherë kryetar i Parlamentit, Jakup Krasniqi, zgjidhjen e krizës institucionale ia ka lënë në dorë partive politike, duke thënë se shkurtimi i krizës institucionale ka mundësi të ndodhë nëse shkohet në zgjedhjet e parakohshme, por për këtë ai vlerëson se duhet të vendosin partitë që janë në Kuvend.
Ai këto komente i bëri të martën, gjatë një takimi me një delegacion nga Bundestagu Gjerman, të cilin e udhëhiqte Ute Kumpf.
Krasniqi ka theksuar se pas të ditës shtunë ka një realitet të ri në Kosovë dhe zgjedhjet parashihen me Kushtetutën e Republikës së Kosovës. Sipas tij në raste të tilla dhe këto zgjedhje varen nga kryeministri i Kosovës, por edhe nga partitë politike që të participojnë në Kuvend, kurse nga grupet parlamentare ai pret reagimet e duhura.
Ute Kumpf, që kryeson delegacionin e Bundestagut gjerman ka theksuar se këto zhvillime përcillen me vëmendje nga Gjermania. Por ajo nuk ka dashur të kritikojë situatën politike në Kosovë, duke kërkuar nga partitë kosovare që të veprojnë me përgjegjshmëri.
"Mua si mysafir nuk më takon që të jap kritikë, apo të vlerësoj situatën politike të Kosovës, mirëpo mendimi im personal është se ne presim nga partitë politike që ata të veprojnë me përgjegjshmëri dhe sipas Kushtetutës, dhe pres që të ketë zgjedhje, kur them zgjedhje, ato janë pjesë e sistemit parlamentar dhe demokratik. Dhe ne kemi përgjegjësi sa i përket zhvillimeve politike në Kosovë", ka thënë Kumpf.
Vizita e delegacionit gjerman zhvillohet për arsye se do të ndahen dy bursa nga Parlamenti gjerman, për dy studiues nga Kosova. Për këto dy bursa kanë aplikuar 8 të rinj, të cilët sot do të intervistohen.