[You must be registered and logged in to see this image.] Milano, 20 tetor - Trajneri i Tottenhamit, Harry Redknapp, do t'u mbajë një fjalim të thjeshtë futbollistëve të tij në zhveshtore para takimit me Interin, të mërkurën mbrëma në Milano (20:45).
"Ndaleni Samuel Eto'on dhe kampioni i Evropës mund të mposhtet", kjo do të jetë kërkesa kryesore e Redknappit për ndeshjen e Grupit A të Ligës së Kampionëve.
Si Interi ashtu edhe Tottenhami janë skuadra të pamposhtura në grupin e tyre. Në dy ndeshje të zhvilluara kanë tubuar nga katër pikë, kanë arritur nga një fitore dhe një barazim.
Eto'o këtë edicion ka shënuar 12 gola në 11 ndeshje të zhvilluara dhe është bërë njëri ndër futbollistët më të rëndësishëm tek Interi pas lëndimeve të Diego Militos dhe Goran Pandevit.
Tifozët dhe kritikët vlerësojnë se Interi po varet nga forma e Eto'os këtë edicion, pasi në edicionin e shkuar nuk tregoi formë të lartë. Mirëpo, trajneri Rafael Benitez kanë mendim të ndryshëm sa i përket Eto'os.
"Eto'o është në formë fantastike dhe kjo është një gjë shumë e mirë për ne, mirëpo nuk duhet harruar se ekipi ynë mund të shënojë gola në rrugë të ndryshme dhe jo vetëm nëpërmjet tij", ka deklaruar Benitez. Spanjolli Benitez e njeh shumë mirë Tottenhamin pasi plot gjashtë vjet i ka kaluar në Premier League në krye të Liverpoolit. "Do të jetë një ndeshje shumë e vështirë, Tottenhami është një skuadër shumë e fortë dhe e shpejtë. I njoh mirë".
Interi gjatë kësaj vere e shiti sulmuesin Mario Balotelli te Manchester City dhe largimin e tij nuk e mbuloi me asnjë futbollist tjetër. Në rast se Eto'o nuk është në formë, atëherë tek Interi nuk ka sulmues për të shënuar gola.
Wesley Sneijder po luan mirë, por ai ka rolin e organizatorit, kurse në mungesë të Militos e Pandevit, trajneri Benitez është detyruar të inkuadrojë Coutinhon dhe Jonathan Biabianyn në formacionin e tij të zakonshëm 4-2-3-1.
Ky formacion në ndeshjen e fundit të Ligës së Kampionëve me Werder Bremenin doli i suksesshëm, pasi Interi fitoi me rezultatin 4:0 dhe Eto'o shënoi "hat-trick". Mirëpo ky formacion nuk u tregua shumë i suksesshëm në vikendin e shkuar kur Interi në udhëtim mposhti Cagliarin 1:0 me golin e sulmuesit kamerunas, që gjatë 90 minutave u përballë me fyerjet raciste të tifozëve vendas.
Tek Interi për këtë ndeshje do të mungojë mesfushori argjentinas Esteban Cambiasso, kurse Tottenhami do të ketë probleme më të mëdha. Mungon holandezi Rafael van der Vaart që këtë edicion ka shkëlqyer dhe mbrojtësi Ledley King. Van der Vaart është i suspenduar, derisa King u dëmtua në ndeshjen me Fulhamin, të cilën e fitoi në udhëtim 1:2.
Në mbrojtje te Tottenhami pritet të luajnë William Gallas dhe Sebastien Bassong, që nuk janë plotësisht të gatshëm për lojë.
"Gallas duhet të luajë patjetër, sepse nuk ka kush tjetër. Kemi nevojë për të sepse është me përvojë dhe na jep siguri në mbrojtje. Më duhet të rrezikojë me Interin", është shprehur trajneri anglez Redknapp. "Nuk do të jetë aspak lehtë, por shpresoj të vazhdojmë me formën që kemi treguar deri tani".
E mërkurë (20:45)
Grupi A
Inter - Tottenham
Twente - W. Bremen
1. Inter 2 4
2. Tottenham 2 4
3. Twente 2 1
4. W. Bremen 2 1
Grupi B
Schalke - H. Tel-Aviv
Lyon - Benfica
1. Lyon 2 6
2. Schalke 2 3
3. Benfica 2 3
4. H. Tel-Aviv 2 0
Grupi C
G. Rangers - Valencia
Man. Utd - Bursaspor
1. Man. Utd 2 4
2. G. Rangers 2 4
3. Valencia 2 3
4. Bursaspor 2 0
Grupi D
Panathinaikos - Rubin K.
Barcelona - Kobenhavn
1. Kobenhavn 2 6
2. Barcelona 2 4
3. Rubin K. 2 1
4. Panathinaikos 2 0