Prishtinë, 22 tetor - Bendi i njohur francez “Nouvelle Vague” sonte në Pallatin e Rinisë në Prishtinë mban një koncert. Bendin francez në Prishtinë e sjellë Organizata SURF, e cila në Prishtinë ka sjellë edhe koncertin e 50 Cent, “Buena Vista” dhe “Morcheeba”.

Mësohet se prania e këtij grupi në Prishtinë, përveç sponsorëve, është ndihmuar edhe nga Ambasada franceze. Milot Hasimja, njeri ndër organizatorët e këtij koncerti, në një prononcim për media ka thënë se ky koncert do të jetë një ngjarje shumë e madhe argëtuese-kulturore, që të pranishmëve do t’u sjellë kënaqësi të jashtëzakonshme.

“Sjellja e bendeve të njohura në Prishtinë ka për qëllim pasurimin e jetës kulturore në Prishtinë me muzikë kualitative”, është shprehur Petrit Selimi, po ashtu njëri nga organizatorët. Ai tha se edhe koncerti në Prishtinë e bendit “Nouvelle Vague” është në kuadër të një turni të përgjithshëm pas botimit të albumit të fundit që u vlerësua mirë nga kritika dhe njohësit e muzikës.

“Nouvelle Vague” që do të thotë “Vala e re” është një bend eksperimental që bën interpretime të muzikës së vjetër rock, me ngjyra melodike të Bossa Nova dhe New Wave. Albumi i fundit ka pasur producent Depeche Mode dhe ka arritur të shpërthejë kufijtë e Francës me muzikë të veçantë. Në një nga recensionet e fundit mbi bendin, gazeta prestigjioze “Washington Post” e quan bendin “përrallor”.