Në muajt në vazhdim pritet të ketë evenimente kulturore të mëdha në Kosovë, premtojnë organizatorët e koncertit të bendit francez "Nouvelle Vague".

Njëri nga organizatorët, Petrit Selimi ka thënë të shtunën se kjo verë ka qenë e shënuar me disa ngjarje kulturore, por ato prapë se prapë kanë qenë të pakta.

“Reaksionet e publikut kanë qenë aq të mira, që ka pas thirrje kërkesa që me të vërtet në Kosovë me popullatën më të re në Evropë është e pamundur që ka aq pak evenimente muzikore të mëdha”, ka thënë Selimi.

Këta organizatorë kohë më parë kanë sjellë në Prishtinë grupin anglez “Morcheeba” dhe duke u nisur prej kësaj që ka pas efekt sjellja e këtij grupi ka vazhduar me sjelljen e grupeve tjera.

Ata kanë nisur një iniciativë me emrin “Surf”, një seri prej tri koncerteve të ardhshme me yjet e mëdha të muzikës botërore.

“Koncerti i parë do të mbahet më 22 dhjetor nga bendi francez “Nouvelle Vague”. Albumi i tyre ka dalë këtë muaj. Ata tash janë në turne globale me ndihmën e ambasadës franceze. Ne po e iniciojmë këtë për të pasuruar jetën muzikore të Prishtinës”, ka theksuar ai.

Bendi “Nouvelle Vague” do të performojë këngët e tre albumeve, sidomos të albumit të fundit që është shumë i suksesshëm. Bendi përbëhet prej 9 anëtarëve.

Koncerti do të mbahet në sallën e sporteve “Pallati i Rinisë” që llogaritet se ka kapacitet prej 3 mijë deri 3500 persona. Bileta për këtë koncert do të kushtojë 7 euro./S.Shkodra/