Herat, 23 tetor – Në qytetin Herat të krahinës me po të njëjtin emër në Afganistan, sot në mëngjes është kryer një sulm i armatosur ndaj Zyrës së Kombeve të Bashkuara. Sipas informatave më të reja në këtë sulm nuk është vrarë apo plagosur askush, kurse forcat afgane të sigurisë kanë vrarë një nga sulmuesit.
Në fakt, së pari një sulmues vetëvrasës me automjet të mbushur me eksploziv shpërtheu para hyrjes në zyrën e Kombeve të Bashkuara, njofton agjencia amerikane e lajmeve AP. Sipas pohimeve të autoriteteve afgane, pas këtij shpërthimi në ndërtesë të KB-ve kanë depërtuar së paku tre sulmues të pajisur me eksploziv.
Zëdhënësi i KB-ve Dan McNorton nuk kishte të dhëna se sa njerëz ndodheshin në ndërtesë në momentin e sulmit dhe a mos ishte plagosur ndokush. Mirëpo, agjencia franceze e lajmeve AFP raporton se në ndërtesë ishin 20 zyrtarë, por askush nuk është plagosur. .
Në një zhvillim tjetër në Afganistan, në jug të vendit, në Kandahar është plagosur rëndë një fotoreporter i gazetës New York Times, i cili ka shkelur në një minë.