Prishtinë, 26 tetor - Këshilli Gjyqësor i Kosovës (KGJK) sot zyrtarisht ka marrë përsipër përgjegjësinë për përzgjedhjen dhe emërimin e gjykatësve dhe prokurorëve, theksohet në një komunikatë për shtyp të Zyrës Ndërlidhëse të Komisionit Europian në Kosovë. Me një ceremonie zyrtare u përfundua procesi i gjatë 30 muajsh i verifikimit dhe riemërimit, i udhëhequr nga Komisioni i Pavarur për Gjyqësi dhe Prokurori (KPGJP).

Kandidatët për të gjitha pozitat në gjyqësi janë emëruar pas procesit të verifikimit dhe vlerësimit ku përfshihej vlerësimi i kompetencës profesionale, hetimet në lidhje me historikun, shpalosjen e financave dhe shqyrtimin performancës së punës dhe të dhënave profesionale.

Kjartan Björnsson, drejtor i Operacioneve në Zyrën Ndërlidhëse të KE-së tha se “I tërë procesi është bërë në harmoni të plotë me standardet dhe praktikat evropiane. Prandaj, përfundimi i suksesshëm i procesit të riemërimit shënon kapitull të ri për gjyqësinë dhe prokurorinë në Kosovë."

Ky proces në kombinim me reformat, që janë në proces e sipër – Ligji për Gjykatat, përmirësimi i administrimit të gjykatave, infrastruktura më e mirë dhe rritja e pagave – do të rezultojë me një gjyqësor më të fuqishëm dhe të pavarur.

Rreth 60% e gjykatëse dhe prokurorëve të emëruar janë emra të rinj në këto pozita. Sistemi i ripërtërirë gjyqësor tani ka 30% femra gjyqtare dhe prokurore (97), ndërsa minoritetet përbëjnë 4,3% (ose 15 kandidate) nga numri total. Më shumë se 345 kandidatë janë emëruar gjatë këtyre 30 muajve.

Organi i ri përgjegjës, KGJK, tani ka përgjegjësi të plotë për proceset e ardhshme të identifikimit, ekzaminimit dhe emërimit përmes një procesi të drejte, efikas dhe objektiv. KGJK do të përfundojë këtë proces duke emëruar kandidatë edhe për 116 pozita të paplotësuara.

Projekti i verifikimit dhe riemërimit, i udhëhequr nga KPGJP-ja, është përkrahur nga BE-ja dhe Qeveria e ShBA-ve.

Dje, me rastin e publikimit të emrave të gjyqtarëve dhe prokurorëve të përzgjedhur u bë e ditur se presidenti në detyrë, Jakup Krasniqi, nuk e ka përfillur plotësisht listën e të përzgjedhurve nga KPGJP, duke shfrytëzuar kështu të drejtën që ia jep ligji. Por, për arsyet e heqjes së ndonjë emri nga lista ai ende nuk ka dhënë arsyetime.
Po ashtu bëhet e ditur se tre nga anëtarët e KGJK-së do të shkarkohen, për shkak të konfliktit të interesit.