Prishtinë, 26 tetor - LDK-ja nuk është kundër zgjedhjeve të jashtëzakonshme. Lideri i saj, Fatmir Sejdiu, nuk i ka përjashtuar si opsion zgjedhjet e jashtëzakonshme, duke thënë se LDK-ja mbështet rrugët që janë të pranueshme nga Kushtetuta e Kosovës.
Duke folur për procesin zgjedhor në parti, Sejdiu ka lënë të kuptohet se as që e ka ndërmend të hiqet nga gara për kryetar të partisë, pavarësisht se përkrahja për kryetarin e Prishtinës, Isa Mustafa, po rritet që ai të kandidojë. I pyetur për deklarimin e djeshëm të Mustafës, që e ka lënë të hapur kandidimin për lider partiak, Sejdiu ka thënë se LDK-ja i ka dyert e hapura për të gjithë. Sejdiu ka buzëqeshur me ironi kur është pyetur për brohoritjet e simpatizantëve të LDK-së që të hënën kërkuan nga Sejdiu të largohet nga LDK-ja.
Në LDK kanë aderuar disa anëtar të Partise Liberale të Kosovës, për të cilët u tha se janë përkrahës të Frashër Demajt, që ditë më parë kaloi në LDK.