Prishtinë, 29 tetor - Ministri i Punëve të Brendshme, Bajram Rexhepi dhe kryetarja e Komisionit Qendror të Zgjedhjeve, Valdete Daka nënshkruan sot një Memorandum bashkëpunimi, me ç’rast MPB-ja do të sigurojë Regjistrin civil të fundit, në bazë të të cilit do të përpilohet lista përfundimtare e votuesve.
Me anë të kësaj marrëveshje Policia e Kosovës do të kujdeset për sigurinë e qendrave të votimit, për sigurimin e transportit, të materialit sensitiv, si dhe për çështjet të tjera.

Kryetarja e KQZ-së, Valdete Daka, tha “sot së bashku me ministrin e Brendshëm, z. Bajram Rexhepi nënshkruam një Memorandum mirëkuptimi, ku Ministria e Punëve të Brendshme do të sigurojë Regjistrin Civil të fundit, në bazë të të cilit do të përpilohet lista përfundimtare e votuesve. Gjithashtu do të bëhet edhe sigurimi i tërë procesit zgjedhor, pra MPB-ja do të kujdeset për sigurinë e qendrave të votimit, për sigurimin e transportit, të materialit sensitiv, si dhe për çështjet të tjera me të cilat jemi marrë vesh”.

Ndërsa, ministri i Punëve të Brendshme, Bajram Rexhepi me këtë rast u shpreh “ky është obligim i përbashkët që të kemi regjistrin e listave sa më të pasura për votim dhe që të ketë sa më pak paqartësi. Pos tjerash, është obligim i Ministrisë sonë, përkatësisht policisë që në ditën e zgjedhjeve të mbahet rendi dhe siguria dhe çdo gjë që kërkohet nga KQZ-ja, qoftë edhe për transportimin e materialit sensitiv.

Ai tha se po ashtu se Policia do ta kryej punën mirë, ashtu siç e ka bërë edhe në zgjedhjet e kaluara. “Në aspektin teknik do të jemi të përgatitur kurdo që të mbahen zgjedhjet”, tha ministri.