Mitrovicë, 4 nëntor- Oliver Ivanoviq i ka bërë thirrje të enjten Komisioni Qendror Zgjedhor të Serbisë që të ndërhyjë për zgjidhjen e situatës së krijuar në të ashtuquajturën komunë serbe të veriut të Mitrovicës.
Ditë më parë përfaqësuesit e Tomisllav Nikoliqit dhe Vojisllav Koshtunicës me forcën e armëve kanë zaptuar objektin e komunës paralele në veri të Mitrovicës, duke dëbuar nga aty koalicionin aktual të prirë nga partia e presidentit Tadiq.
Iniciativa qytetare “Serbia, Demokracia, Drejtësia” e Oliver Ivanoviqit, ka shprehur shqetësime serioze për shkak të situatës së krijuar pas zaptimit të ashtuquajturit Kuvend Komunal në veri të Mitrovicës, për shkak të situatës ende të pazgjidhur rreth mandateve kontestuese. “Me ndërhyrje jolegale janë stopuar të gjitha aktivitetet e qeverisë lokale, janë vënë në pikëpyetje interesat qytetare, si dhe janë ndërprerë pagat e punëtorëve komunalë”, ka thënë Ivanoviq për mediat serb të enjten.
Iniciativa e Ivanoviqit i bëri thirrje Komisionit Zgjedhor të Serbisë që urgjentisht të zgjidhë rastin dhe në këtë mënyrë të qetësojë situatën e pavolitshme në të cilën gjendet komuna e veriut të Mitrovicës.