Pas shtatë vitesh si moderator i spektaklit “Portokalli”, Agron Llakaj ka vendosur të largohet, për t’u rishfaqur në një tjetër ekran, me një tjetër format.

Bëhet fjalë për programin “Kush do bëhet milioner” (Who wants to be a millionaire), i njohur më së shumti si “Milioneri” (Millionaire), që nga janari do të drejtohet nga Agron Llakaj në “Tv Klan”.

Në një intervistë për “Panorama Plus”, Llakaj zbulon arsyen e këtij ndryshimi në karrierën e tij:
''Realisht ky projekt nuk lindi tani. Oferta m’u bë që në muajin mars, personalisht nga përfaqësesi i “Grand media” në Kosovë, që ka blerë patentën për 10 vite të formatit (Who wants to be a millionaire), “Kush do bëhet milioner”. Mu ofrua me shumë kënaqësi që të isha unë drejtuesi i ri, duke u provuar nëpërmjet një testi. Mu duk si një dritare e ngrohtë familjare dhe që më duhej ta rrokja. ''

Me tej, Llakaj ka refyer: ''Me të marrë ofertën, fillimisht e ofrova pranë institucionit “Top Channel”, por drejtuesit nuk e pranuan. Pasi nuk u realizua diçka në “Top Channel”, ata më kërkuan të isha patjetër unë prezantuesi dhe unë vendosa si kusht që të shfaqesha vetëm në televizion kombëtar dhe u vendos për Tv Klan.''