Të hënën mbrëma, në Washington, në moshën 69-vjeçare, ka vdekur diplomati amerikan, Richard Holbrooke. Ai ishte në gjendje kritike shëndetësore për shkak të problemeve me aortë, prej të premtes, derisa po punonte në Departamentin Amerikan të shtetit.
Presidenti amerikan, Barack Obama, tha se Holbrooke ishte “gjigant i vërtetë i politikës së jashtme amerikane”. “Richard Holbrooke e ka shërbyer vendin tonë me nder për afro 50 vite, nga një oficer i ri i jashtëm në Vietnam, e deri tek arkitekti i marrëveshjeve që i ndalën masakrat në Ballkan. Ai i avanconte përpjekjet tona rajonale si përfaqësues special në Afganistan dhe Pakistan. Ai thjesht ishte një nga gjigantët e politikës së jashtme amerikane”, ka thënë Obama.

Në deklaratën e dhënë pas vdekjes së diplomatit amerikan, Obama ka thënë janë miliona njerëz në mbarë botën, jetët e të cilëve ishin shpëtuar dhe pasuruar nga puna diplomatike e Holbrookut, në zonat e trazuara dhe me luftëra në rajone.

Sekretarja amerikane e Shtetit, Hillary Clinton, në deklaratën e saj tha se SHBA-të e kanë humbur njërin prej “kampionëve të saj më të fuqishëm dhe shërbyesin më të dedikuar”.

Së fundit, ai ishte i dërguar special i presidentit Obama për Afganistanin dhe Pakistanin.
I ndjeri Holbrooke ishte arkitekt i Marrëveshjes së Daytonit në vitin 1995, me të cilën përfundoi lufta në Bosnjë e Hercegovinë.

Në fund të viteve të viteve 90-ta të shekullit të kaluar, ai u kthye në Ballkan, në kohën kur në Kosovë shpërtheu lufta ndërmjet forcave serbe dhe shqiptarëve.

Raportohet se në mars të vitit 1999 ai shkoi në Beograd për t’i dhënë ultimatumin përfundimtar, ish-presidentit të Serbisë, Slobadan Milosevic, se NATO-ja do të bombardojë nëse agresioni ndaj Kosovës nuk ndalet. Milosevici nuk i pat dëgjuar këto vërejtje, ndërsa më 24 mars filluan bombardimet e NATO-s.