Prishtinë, 20 shtator – Presidenti Fatmir Sejdiu i ka filluar takimet me përfaqësues të shteteve të ndryshme në New York. Ai ka pasur takime me disa nga presidentët e vendeve që nuk e kanë njohur Kosovën, të cilëve u kërkoi që të njihet e drejta e popullit të Kosovës që të jetojë i lirë dhe i pavarur, njoftoi Zyra për Informim e Presidencës nëpërmjet komunikatës për shtyp.

Gjatë një takimi bilateral me presidentin e Republikës Afrikës Qendrore, François Bozize, Sejdiu, i shoqëruar nga kryeministri Hashim Thaçi dhe ministri Skënder Hyseni, e ka ftuar këtë vend ta njohë Kosovës, hap ky që do të mundësonte pastaj bashkëpunimin e ngushtë në mes të dyja shteteve.

Presidenti Bozize e ka falënderuar presidentin Sejdiu për informatat e dorës së parë dhe tha se shteti i tij i jep rëndësi të madhe çështjes së Kosovës. Ai ka thënë se e kuptojnë vullnetin e popullit të Kosovës për të jetuar i lirë dhe i pavarur, dhe se janë duke e analizuar me vëmendje të gjithë situatën.

Në një mbrëmje të veçantë për Afrikën, organizuar nga “Cinema for Peace Foundation”, presidenti Sejdiu u takua edhe me presidentin e Ruandës, Paul Kagame, si dhe liderë e ministra të tjerë të cilët ishin prezentë në këtë mbrëmje. Në bisedën me presidentin Kagame, Sejdiu përsëriti kërkesën për njohje të Republikës së Kosovës.

“Presidenti Sejdiu, kryeministri Thaçi, ministri Hyseni dhe delegacioni përcjellës darkuan me kryeministrin e Shqipërisë, Sali Berisha. Delegacionet diskutuan koordinimin e mëtejmë dhe bashkëpunimin e ngushtë mes të dyja shteteve, si dhe procesin e njohjes së pavarësisë së Kosovës”, thuhet në komunikatën e Presidencës.