Uploaded with ImageShack.us
Aleanca Kosova e Re (AKR) ka kërkuar që sa më shpejt të përcaktohet data e mbajtjes së zgjedhjeve të parakohshme nacionale, në mënyrë që vendi të dalë nga kriza që është thelluar.

Në një konferencë për media të shtunën, zëvendëskryetarja e AKR-së Mimoza Kusari – Lila ka thënë se rrethanat e krijuara pas dorëheqjes së ish presidentit Fatmir Sejdiu, nuk lënë zgjidhje tjetër, përpos shkuarjes së vendit në zgjedhje të parakohshme, të cilat do të duhej të mbaheshin në shkurt, eventualisht në mars të vitit të ardhshëm.

Kusari – Lila: S’ka zgjidhje tjetër, përpos zgjedhje
“Aleanca Kosova e Re vlerëson se ngjarjet e fundit në Kosovë, nuk lenë asnjë zgjidhje tjetër të situatës aktuale politike, përveç shpalljes së zgjedhjeve të parakohshme. Asnjë variant tjetër i zgjatjes së jetës së kësaj qeverie, nuk është në favor të qeverisjes së mirë dhe zgjidhjes së problemeve të akumuluara të qytetarëve të Republikës së Kosovës”, ka thënë Kusari Lila.

Kusari-Lila ka numëruar një sërë shkeljesh, që ka bërë gjatë kësaj kohe koalicioni qeverisës PDK - LDK, të cilat sipas saj janë të mjaftueshme për përfundimin e “jetës” së tij.

Kjo Qeveri, sipas Kusarit-Lila ka qëndruar së bashku, gjithmonë për arsyet e gabuara dhe për interesa të ngusha, andaj AKR nuk pajtohet që të ketë president të ri, por të ketë zgjedhje të parakohshme.

Kusari-Lila: Jo president të ri

“AKR dëshiron të theksojë, se në asnjë moment dhe në asnjë mënyrë që nga shpallja e dorëheqjes së presidentit Sejdiu, nuk e ka përkrahur dhe nuk do ta përkrah reciklimin e votës së qytetarit duke mandatuar President të ri apo Qeveri të re”, ka thënë Kusari-Lila.

Ndërkohë, Kusari-Lila ka thënë se kryetari i AKR-së, Behgjet Pacolli ka pasur ftesë nga njëri subjekt politik, pjesë i koalicionit që të pranojë ofertën për t’u bërë president i Republikës së Kosovës, në mënyrë që vendi të dalë nga kriza. Por, AKR, sipas Kusari-Lilës nuk do të pranojë që të jetë pjesë e pazareve politike, respektivisht nuk do të pranojë postin e presidentit jashtë votës së lirë të qytetarit dhe pa mbajtjen e zgjedhjeve të përgjithshme.

Kusari-Lila në emër të AKR-së i ka bërë thirrje Kuvendit që ta miratojë sa më shpejtë që të jetë e mundur Ligjin e amandamentuar mbi zgjedhjet e përgjithshme, si dhe ushtruesit të detyrës së presidentit të Kosovës, Jakup Krasniqi, që në pajtim me partitë politike, të shpall datën e zgjedhjeve të parakohshme, konform nenit 4 të ligjit mbi Zgjedhjet e Përgjithshme në Kosovë./S.Shala/