Prishtinë, 15 tetor – Presidenti në detyrë Jakup Krasniqi ka shpallur sot vendimin sipas të cilit, zgjedhjet e parakohshme parlamentare në Kosovë do të mbahen më 13 shkurt 2011.
Vendimi është marrë duke u bazuar në nenin 90 dhe në nenin 84 pika 3 të Kushtetutës së Republikës së Kosovës, në nenin 4 pika 3 të Ligjit për Zgjedhjet e Përgjithshme në Kosovë, si dhe me marrëveshje me partitë politike dhe Komisionin Qendror Zgjedhor.
Me vendim udhëzohet Komisioni Qendror i Zgjedhjeve i Republikës së Kosovës t’i ndërmarrë të gjitha veprimet e nevojshme për organizimin e zgjedhjeve për Kuvendin e Kosovës, në përputhje me këtë vendim dhe ligjin në fuqi.
Ndërkaq, në takimin që Jakup Krasniqi ka mbajtur me përfaqësuesit e partive politike, është vendosur që zgjedhjet për kryetar të Rahovecit të mbahen më 21 nëntor.