Trajneri i Mançester Sitit, Roberto Mançini mendon se Çelsi do ta mbrojë titullin e kampionit në këtë edicion në Ligën Premiere. Mançini mendon se skuadra e Karlo Ançelotit në aspektin teknik është e baraspeshuar me Arsenalin, por është superiore në aspektin fizik, gjë e cila sipas tij është e mjaftueshme për ta fituar titullin e kampionit. ...



“Çelsi është ekipi më i fortë në kampionat. Në aspektin teknik vetëm Arsenali mund të jetë në nivel të njëjtë me të, por fizikisht Çelsi është më i fortë. Ky është dallimi i vetëm ndërmjet këtyre dy skuadrave”, ka thënë Mançini, i cili nuk e ka përmendur fare rivalin lokal Mançester Junajted. Siti është skuadra e vetme e cila deri më tash ka arritur ta mposht skuadrën nga “Stamford Bridge”, me golin e Karlos Tevezit. “Pas ndeshjes i thashë Ançelotit se të mposhta, por ju do ta fitoni titullin e Ligës Premiere, sepse jeni më të mirë se ne. Këtë mendim e kam edhe tash”, ka thënë strategu italian, duke shtuar se skuadra e tij mund të jetë një rival serioz për të gjitha skuadrat e forta në Ligën Premiere. “Pronarët e klubit do të ishin të kënaqur me vendin e tretë apo të katërt në këtë edicion, ngase synimi kryesor është kualifikimi në Ligën e Kampionëve. Kam biseduar me shikun Mansur dy herë deri më tash dhe natyrisht e kam quajtur ‘Lartësia Juaj’. Megjithatë për mua pikë referuese për çështjet rreth klubit është presidenti, Kaladon Al Mubarak, që është një njeri i shkëlqyer dhe i cili i ndjek gjithmonë ndeshjet tona në stadium”, ka nënvizuar Mançini. Mançester Siti pas javës së shtatë ndodhet në pozitën e dytë në Ligën Premiere.