Nxënësit e shkollës fillore “Skënderbeu” nga Jezerci i Ferizajt dhe ata të shkollës “Dituria” nga Strazha e Kaçanikut, kanë kaluar së bashku disa çaste shoqërimi me pjesëtarët e forcave greke në kampin “Rigas Fereos” në Gurëz.

Ata gjatë qëndrimit kanë zhvilluar disa aktivitete sportive, ndërsa nuk ka munguar as dreka e përbashkët ku ka dominuar ushqimi tradicional grek. Me këtë rast komandanti i KFOR-it grek, nënkoloneli Jorgos Chatzitheofanou ka thënë se momentet e shoqërimit janë të veçanta ngase në këtë mënyrë nxënësit njihen me punën dhe aktivitetet e pjesëtarëve të KFOR-it.

“Ne ju kemi ftuar sot që të bëhemi shokë, do të luajmë futboll, basketboll e sporte tjera. Do ta vizitojmë kampin dhe ju do të njiheni me jetën e ushtarëve në kamp”, tha ai.

Në këtë takim ishte i pranishëm edhe kryetari i komunës së Ferizajt Bajrush Xhemajli, i cili ka thënë se takimet e tilla shërbejnë për lidhjen e urave të miqësisë.

Ndërkohë edhe drejtori i shkollës fillore “Skënderbeu” , Burim Uksmajli si dhe nxënës të kësaj shkolle e vlerësuan lart qëllimin e vizitës, duke thënë se KFOR-i në vazhdimësi ka ndihmuar shkollën e tyre dhe se kjo vizitë hynë në vazhdën e aktiviteteve të përbashkëta.

Ndryshe, KFOR-i grek është përgjegjës për ruajtjen e sigurisë në Ferizaj, ndërsa u bë e ditur se takime të tilla me fëmijë të shkollave do të ketë edhe në të ardhmen./B.Idrizi/