Mitrovicë, 16 tetor - Persona të panjohur kanë hequr flamurin serb nga ndërtesa e ashtuquajtur e Kuvendit Komunal në veri të Mitrovicës, e cila 24 orë ruhet nga pjesëtarë të Policisë së Serbisë, të cilët janë civilë dhe me vetura.

Megjithkëtë, kryetari i kësaj komune paralele, për këtë heqje të flamurit ka fajësuar shqiptarët. Kryetari i komunës paralele, Ivica Mirkoviq ka thënë të shtunën për mediet serbe se flamuri nga kjo ndërtesë është hequr rreth orës 22:00. Ai nuk ka hezituar të akuzojë se dikush nga përfaqësuesit shqiptarë është përgjegjës për këtë incident. Sipas tij, në momentin kur ka ndodhur ky akt, punëtorët e sigurimit nuk e kanë vërejtur zhdukjen e flamurit. “E gjykoj këtë akt dhe konsideroj se aktet e tilla shpien drejtë destabilizimit të situatës në veri të Kosovës. Besoj se pjesëtarët e komunitetit shqiptar janë të përfshirë në këtë incident dhe se flamuri është dërguar në pjesën jugore të qytetit”, ka nënvizuar Mirkoviq.

Mbi këtë ndërtesë të shtunën është vënë prapë flamuri serb, ndërkohë që ndërtesa ndodhet në zonën e ‘Tre rrokaqiejve’, e cila është e banuar me popullatë të përzier dhe ruhet 24 orë pa ndërprerë nga pjesëtarë të policisë serbe që vepron në veri të Mitrovicës.