Skenderaj, 18 nëntor – Komuniteti serb i komunës se Skenderajt, i cili jeton në fshatrat Bajë, ku përbëjnë shumicën absolute të banorëve, dhe atë Syriganë, ku e përbëjnë gati gjysmën e fshatit, ka pranuar realitetin e ri dhe është integruar mirë në jetën shoqërore, m,e gjasa të mira që të dalin në zgjedhjet e dhjetorit. Kështu u tha në një takim të mbajtur në zyrën lokale për komunitete në Bajë, ku u bisedua për realizimin e projektit "Integrimi i komunitetit serb në institucionet komunale". Projekti financohet nga OSBE-ja dhe jetësohet nga Qendra e Gruas “Prehja” në Skenderaj, kurse në takim kanë marrë pjesë përfaqësuesit e tetë fshatrave të BL të Runikut dhe zyrtarë të Komunës, të cilët projektin e kanë vlerësuar si shumë të dobishëm.
Ajnishahe Halimi, koordinatore e “Prehjes”, ka thënë se projekti u jep mundësi pjesëtarëve të komunitetit serb që ata të informohen rreth punës dhe strukturës organizative të qeverisjes lokale. “Gjithashtu, projekti mundëson që vetë pjesëtarët e komunitetit serb t'i qasen direkt strukturave komunale për çfarëdo arsyesh apo kërkesash që ata kanë”, ka thënë ajo.
Bozhidar Tomasheviq, kryetar i pjesës serbe të Syriganës, ka thënë se përvoja tregon që
komuniteti i këtushëm serb ka besim në pushtetin lokal të Skenderajt, andaj është mirë që ky pushtet të këtë më shumë parasysh nevojat e këtij komuniteti.
“Institucioneve të Kosovës ju besojmë dhe do t’ju kishim besuar edhe më shumë sikur
ato të realizojnë ndonjë projekt për ne, si pshm. ndërtimi i rrugës, kanalizimit, ujësjellësit, etj”, ka thënë ai dhe ka shfaqur shpresën se komuniteti serb kësaj radhe do të marrë pjesë në zgjedhjet e dhjetorit.
Nga ana e tij, Murat Dauti, kryetar i BL të Runikut, është shprehur i kënaqur me integrimin e pakicave në komunën e Skenderajt. “Komuniteti serb është integruar pothuaj plotësisht në jetën shoqërore dhe në institucionet lokale, ndërsa të diferencuar kanë mbetur vetëm ata serbë qe kanë qenë nën diktatet politike të Serbisë, kurse sa i përket po litikës sonë, ata nuk janë të diferencuar”, ka thënë ai.
Duke folur për zgjedhjet e ardhshme, Dauti ka thënë se tek serbët ka vërejtur dëshirën për të marrë pjesë në zgjedhjet nacionale. “Megjithatë, ata janë të lirë të vendosin vet. Serbët e këtushëm kanë të drejtë ta duan Serbinë, por duhet të punojnë për Kosovën”, ka përfunduar ai.