Budapest, 2 dhjetor – Dy vëllezër të pastrehë, Zholt dhe Geza Peladi, të cilët jetojnë në një shpellë afër Budapestit, do të trashëgojnë pjesën më të madhe të trashëgimisë në lartësi prej katër miliardë eurove.
Vëllezërit Peladi nuk kanë adresë të përhershme banimi dhe jetojnë nga shitja e gjësendeve që i gjejnë nëpër rrugë, mirëpo ditët e jetës së tyre të pastrehë së shpejti do të përfundojnë, pasi janë njoftuar se bashkë me motrën e tyre e cila jeton në SHBA, kanë trashëguar pasurinë e gjyshes së tyre.
Punëtorët e organizatave humanitare në Hungari iu kanë komunikuar këtë lajm të gëzuar vëllezërve, pasi kanë kontaktuar me avokatët të cilët përkujdesen për pasurinë e gjyshes së tyre, e cila ka vdekur para ca kohësh ne landin Baden-Vyrtemberg.
"E kemi ditur se nëna ka pasur prejardhje nga familja e pasur, por ajo ka qenë person i rëndë dhe i kishte shkëputur që moti marrëdhëniet me familjen e saj. Pastaj ajo edhe na ka braktisur. E kemi humbur kontaktin me të dhe me babanë. E dimë që ajo ka vdekur", u tha Geza Peladi (43) medieve hungareze.
Sipas ligjit gjerman, pasardhësit direkt automatikisht kanë të drejtë të ndajnë pasurinë e trashëguar. Pasi nëna e tyre ka vdekur, pasuria do t’iu kalohet vëllezërve Paladi.
