Dita e sotme e 14 shkurtit ose siç njihet si Dita e të Dashuruarve shënohet edhe në mesin e estradës tonë. Derisa disa nga këngëtarët tonë thonë se kjo është një ditë e veçantë për ta, ka të tjerë që nuk e quajnë shumë të veçantë këtë. Ndërsa e vlerëson më shumë si një festë për të festuar sesa një datë që do të ‘kurorëzonte’ dashurinë e dy personave, këngëtarja Vesa Luma ka treguar se pikërisht në Ditën e Shën Valentinit ajo do të ketë një udhëtim për të bërë. “Nuk besoj se do të angazhohem këtë vit, për shkak se mua pikërisht për Shën Valentin do më bije të nisem drejt Tiranës. Ditën e Shën Valentinit normalisht që e cilësoj si një festë, por që më shumë them se është arsye për të festuar diçka sesa vetë festa për të cilën bëhet fjalë”, ka bërë të ditur Vesa për “InfoPress”.

“Unë nuk do ta festoj këtë vit, nuk ma marr mendja”, ka shtuar këngëtarja, duke thënë se ajo ‘nuk e ka për zemër’ dhe se Shën Valentini nuk është ‘diçka e veçantë’ për të.

Ndërsa Dafina Zeqiri, e cila gjithnjë ka deklaruar haptazi ndjenjat e saj të dashurisë, ende nuk ka vendosur asgjë sa i përket festës së të dashuruarve.

“Nuk e di ndoshta është pak herët të flas se si, apo a do të festoj. Do shohim”, ka thënë Dafina Zeqiri duke shtuar se Shën Valentinin e vlerëson si një ditë ku njerëzit marrin e dhurojnë dhurata, sikur që do të dhuronin e merrnin dashuri edhe gjatë ditëve tjera të vitit.

E këngëtarja Zanfina Ismaili e ka në plan të festojë me fansat e saj, duke vlerësuar se do të ndihet shumë mirë pranë tyre.

“Si çdo vit të kaluar, edhe kësaj radhe këtë festë do ta festoj me publikun, kështu që nuk do ta ndryshojë traditën. Do të këndoj edhe këtë vit e do të festojë me publikun tim”, ka pohuar Zanfina, ndërsa këtë festë e cilëson si diçka individuale për secilin.

“Mendoj se ajo është diçka individuale, por mendoj që edhe njerëzit duhet të kenë çdo ditë festë të dashurisë, sepse dashuria është diçka që duhet ushqehet çdo ditë”, ka theksuar Zanfina.