Kryeqyteti i Indisë ka ndërmend t’i thotë mjaft urinimit në vendet publike. Me këtë rast, autoritetet e këtij vendi kanë lansuar fushatën “Bukuria e New Delhit është detyrë e secilit”.
Autoritetet e New Delhit, ku në tetor të vitit të ardhshëm do të mbahen Lojërat e Commonwealth-it, së shpejti do të vendosin afishet në të gjitha rrugët e qytetit, autobusët, dhe në vende të tjera të dukshme, duke u bërë thirrje banorëve të mos urinojnë në vende publike, bën të ditur CNN.

“Kryeqyteti i Indisë duhet të jetë i pastër. Shikojeni sa është i pastër Singapori. Pse mos të jetë i tillë edhe New Delhi”, ka thënë kryetari i këtij qyteti Kanwar Sain.

Një fushatë e ngjashme do të fillojë së shpejti edhe në televizione dhe në radio stacionet e këtij vendi.

Urinimi, hedhja e mbeturinave, dhe ndotjet tjera të qytetit nga qytetarët, dënohen më 10 dollarë e më shumë.

Sipas përllogaritjeve të ekspertëve të urbanizimit, New Delhit i nevojiten së paku 40.000 tualete publike, nëse dëshiron të arrijë synimin për të qenë një vend i pastër.