Londër   - Njëzetetetëvjeçari Stewart Penman nuk do të guxojë që gjatë vitit të ardhshëm të hyjë në bibliotekën lokale në Lester, pasi që bibliotekistët dhe anëtarët e tjerë janë ankuar se i vjen një erë shumë e keqe.
Në ndalesën e shkruar, Stewart është paralajmëruar se nuk do t'i mundësohet shfrytëzimi i bibliotekës as pas skadimit të afatit 12-mujor, po qe se nuk fillon që deri atëherë t'i kushtojë rëndësi higjienës personale.
I riu britanik e ka pranuar se këmbëve të tij me të vërtetë iu vjen era e keqe, mirëpo ka shtuar se  nuk e di se ku mund të qëndrojë problemi.
"Çdo ditë bëj dush, mirëpo era e këmbëve nuk më hiqet. Jetoj me nënën, e cila pi duhan shumë, prandaj era që më vjen më së shpeshti është ajo e duhanit. Mendoj se bibliotekistët janë duke më keqtrajtuar, pasi që për një arsye nuk po më duan", ka thënë Stewart.
Në anën tjetër, zyrtarët e bibliotekës kanë thënë se britaniku i ri i ka shpërfillur paralajmërimet e shumta gjatë vitit të kaluar.
"Nuk është e vërtetë se i vjen era duhan, mirëpo djersë të vjetruar. Njerëzit dalin nga biblioteka sa herë që hyn ai brenda", ka thënë drejtoresha Margaret Belamy.

T: Arsimtari bën striptiz në klasë

Londër, 8 dhjetor   - Për ta siguruar vëmendjen e nxënësve të tij, mësuesi në një shkollë fillore në Suffolk, 57-vjeçari Martin Rose, ka vendosur që të bëjë striptiz në klasë.
I nervozuar me zhurmën gjatë orës, ai i ka pyetur nxënësit se çfarë duhet të bëjë që më në fund ta respektojnë. Kur ata ishin përgjigjur se do të mund të zhvishej, ai ka filluar t'i heqë rrobat. Nën aplauzat e shumta të rreth tridhjetë 14-vjeçarëve ai ka mbetur lakuriq në pjesën e sipërme të trupit, mirëpo nuk e ka plotësuar dëshirën e nxënësve që t'i heqë edhe pantallonat. Njëri nga nxënësit e ka incizuar këtë gjë me telefon dhe incizimi është vënë në "Youtube". Ka pasuar një reagim i bujshëm i prindërve, derisa këshilli i arsimtarëve është treguar i mëshirshëm, duke e mbajtur në punë, pasi që ndodhet në prag të pensionit.

T: E dehura shkon ta marrë burrin e dehur

Sydney, 8 dhjetor   - Policia australiane e ka ndalur në periferi të Sydneyt një grua, e cila gjatë ngasjes së automjetit po bisedonte në telefon dhe më pas është vërtetuar se ajo ishte bukur e dehur.
Australiania e dehur u kishte thënë policëve se ishte nisur në stacion policor që ta merrte bashkëshortin e saj, i cili disa orë më herët ishte arrestuar po ashtu për shkak se po e ngiste automjetin në gjendje të dehur.
Përmes alkool-testit është vërtetuar se kjo grua kishte pasur trefish nivel më të lartë të alkoolit në gjak sesa lejohet, edhe pse ishte më pak e dehur sesa bashkëshorti i saj, që kishte pasur gjashtëfishin e së lejuarës.
Në fund, burri e gruaja janë futur në qeli të njëjtë dhe pasi që nuk kishin pasur kënd ta thërrisnin për t'i marrë, ata e kanë kaluar natën në burg.
"Nëse jo asgjë tjetër, ata e kanë respektuar premtimin martesor se do të jenë së bashku në të mirë dhe në të keq", ka thënë duke u tallur polici që e kishte arrestuar gruan. Çifti martesor brenda disa ditësh do të paraqitet para gjyqtarit.