[You must be registered and logged in to see this image.]

Maqedoni: Mbërrijnë 80 mijë vaksinat kundër gripit AH1N1


Në Shkup kanë mbërritur 80 mijë vaksinat kundër virusit AH1N1, të siguruara nga Holanda. Parlamenti i Maqedonisë të mërkurën pasdite ka diskutuar lidhur me përhapjen e kësaj epidemie.
Kërkesa e opozitës për mbylljen e shkollave dhe kopshteve të fëmijëve gjatë kësaj jave nuk është mbështetur nga mazhoranca, pasi që Ministria e Shëndetësisë ka vlerësuar se nuk duhet të ndërmerret një masë e tillë.

Opozita kishte dhënë propozimin duke vlerësuar vendimin e vendit fqinj Serbisë që prej të premtes të mbyllen shkollat për shkak të parandalimit të përhapjes së gripit AH1N1.

Një grua 49 vjeçare është pranuar pranë Klinikës Emergjente në Shkup, pasi që një orë pas marrjes së vaksinës kundër virusit AH1N1 ka ndjerë kokëdhembje dhe dridhje të duarve dhe këmbëve. Burime mjekësore për TV A1 pranë Klinikës kanë theksuar se në momentin kur është sjellë ajo ka pasur një goditje paralizë në një pjesë të trupit.

Lajmi i publikuar ka tronditur autoritetet shëndetësore pranë Ministrisë së Shëndetësisë, mirëpo nuk janë dhënë hollësi zyrtare. Numri i deritanishëm i të sëmurëve nga gripi AH1N1 në Maqedoni ka arritur në afër 1.400 veta. /INA/