[You must be registered and logged in to see this image.]

Autoritetet serbe, amerikane identifikojnë personin pas kërcënimeve


Autoritetet serbe dhe ato amerikane kanë identifikuar një person të dyshuar se i ka dërguar mesazhe kërcënimi me vdekje presidentit serb Boris Tadiq dhe zyrtarëve të tjerë të lartë serbë, si një qytetar serb, i cili jeton në qytetin e Çikagos.
Sipas radios serbe B-92, shefi i policisë, Milorad Veljoviq, tha se i dyshuari i ka dërguar letra kërcënuese vitet e fundit Tadiqit, prokurorit për krime lufte Vladimir Vukçeviq dhe kryetares së Gjykatës së Lartë, Nata Mesaroviq.

Tadiq dhe zyrtarë të tjerë janë zotuar se do të vihen në kërkim të të akuzuarve që nga koha e luftërave ballkanike të viteve '90, që janë në arrati, mes tyre edhe komandanti i serbëve të Bosnjës, Ratko Mlladiq.

Shefi i policisë Veljoviq tha se zyrtarët e lartë amerikanë e ata serbë do të vendosin nëse i dyshuari do t'i nënshtrohet procesit gjyqësor në Shtetet e Bashkuara, apo në se do të ekstradohet në Serbi. Oficeri i policisë nuk e identifikoi personin e dyshuar. /VoA/