Sarkozy kërkon krijimin e shtetit palestinez
--------------------------------------------------------------------------------
Paris, 23 shkurt – Presidenti i Francës Nicolas Sarkozy dhe presidenti i Autoritetit Palestinez Mahmoud Abas dëshirojnë rifillimin e menjëhershëm të negociatave paqësore në Lindjen e Mesme, të cilat do të çojnë në krijimin e shtetit palestinez.
Presidenti francez pas takimit që pati me Abasin në Paris premtoi se do të punojë në krijimin e shtetit modern, të qëndrueshëm dhe demokratik palestinez, i cili si dhe Izraeli do të kenë kryeqytet Jerusalemin. Shteti palestinez do të bazohet në kufijtë e vitit 1967, raportuan mediet izraelite.
Veç kësaj, çdo zgjidhje e krizës në Lindjen e Mesme duhet të përfshijë edhe diskutimin për fatin e refugjatëve palestinezë dhe shkëmbimin e mundshëm të territoreve, tha presidenti francez.
Abas premtoi se shteti do të shpallet në mënyrë të njëanshme vetëm në përputhje me shtetet evropiane dhe SHBA-në.
Gjithashtu, tha se është e nevojshme të kapërcehet hendeku midis qeverisë së tij në Bregun Perëndimor dhe udhëheqjes së Hamasit në Gaza, duke vlerësuar se zgjedhjet demokratike janë e vetmja mënyrë për të arritur këtë.
Sarkozu, siç njoftoi, për situatën në Lindjen e Mesme do të flasë edhe me presidentin amerikan Barack Obama në fund të marsit, kur ai dhe bashkëshortja e tij do të udhëtojnë në Washington në vizitë shtetërore.
