Kryesuesi i presidencës së Bosnjë-Hercegovinës, Haris Silajdzic, thotë se njohja e Kosovës nga ky vend nuk është e mundur për shkak të mënyrës se si funksionon shteti boshnjak.
“Ne nuk e kemi pasur kurrë në rendin e ditës njohjen e Kosovës, për shkak se në përbërjen që kemi ne, njohja e Kosovës nuk do të ishte e mundur, prandaj as që e kemi futur në rend të ditës, duke pasur parasysh votimin në Kuvendin e Bosnjës e Hercegovinës. Kjo thjesht nuk do të ishte e mundur, prandaj vendosja në rendin e ditës së çështjes së Kosovës do të nënkuptonte hapjen e një debati pa kurrfarë rezultati”, ka thënë Silajdzic në një intervistë për BBC.

Ndërkohë, Silajdzic ka mirëpritur rekomandimin e Komisionit Evropian për liberalizimin e vizave për Bosnjën e Hercegovinën dhe Shqipërisë, duke shtuar se Bosnja e Hercegovina i ka përmbushur kushtet, që sipas tij, në këtë drejtim ka bërë më shumë se sa disa vende anëtare të BE-së.