Shtetasi i Kosovës, Fuad Ramiqi, që ishte në anijen, së bashku me qytetarë të dyzet vendeve të botës, që po dërgonte ndihma në Palestinë, kur u sulmua nga forcat ushtarake izraelite, në orët e hershme të mëngjesit ka arritur në Stamboll.
Lajmin e ka bërë të ditur vetë Ramiqi, i cili gjatë një bisede telefonike për “Zërin” ka thënë se është shëndosh e mirë, dhe se shumë shpejtë do të kthehet në Prishtinë.

“Jam shumë mirë. Të premten apo të shtunën më së largu do të kthehem në Kosovë. Momentalisht jam në Stamboll”, ka thënë Ramiqi nëpërmjet telefonit.

Fuad Ramiqi është nisur për të dërguar ndihma javën e kaluar, ndërsa karvanit me anije i është bashkangjitur në Stamboll të Turqisë. Prej momentit kur anija është sulmuar nga forcat izraelite, ai ishte në një tip burgu në Breshev të Izraelit.

Në foton e sipërme shihet Ramiqi në Aeroportin e Stambollit duke përshëndetur të pranishmit që kanë dalë për t’i pritur humanitarët, ish-pjesëtarë të anijes me ndihma.