Përditësimi më i ri i softuerit kundër viruseve të kompanisë McAfee shkakton rrëzimin e kompjuterëve të bazuar në sistemin operativ Windows XP.

Përditësimi ka qenë në dispozicion të përdoruesve për shkarkim katër orë para se është tërhequr, e ai ka shkaktuar dëm të madh përdoruesve kompjuterët e të cilëve kanë filluar papritmas të rrëzohen. Problemi lidhet me emërimin e gabueshëm të dosjes legjitime të sistemit operativ svchost.exe si virus W32/Wecorl.a.

Përditësimi ka shkaktuar më së shumti probleme në kompanitë e mëdha ku administratorët e sistemeve duhet të zbatojnë një nga një procedurën të cilën McAfee e ka lëshuar për të aftësuar kompjuterët e tyre sërish për punë normale.

McAfee ka publikuar në faqet e veta zyrtare të internetit të gjitha udhëzimet se si të zgjidhet ky problem, edhe pse për të bërë këtë nevojitet njohuri e caktuar teknike, prandaj për disa përdorues papërvojë kjo do të jetë bukur e komplikuar.

Tani për tani në McAfee vetëm kanë pohuar se ende janë duke punuar në gjetjen e një zgjidhjeje automatike për këtë problem.