Këshilli i Sigurimit i Kombeve të Bashkuara do të diskutoj sot për situatën e sigurisë në Kosovë pas një varg incidentesh në veri të vendit. Zëdhënësi i UNMIK-ut Rusell Geekie i ka thënë Radio Kosovës se shefi i UNMIK-ut Lamberto Zannier do të flas për Kosovën në këtë mbledhje dhe ai ka me vete të gjitha informacionet e fundit rreth situatës së sigurisë në Kosovë përfshi edhe incidentet në Mitrovicë


Kreu i UNMIK-ut Lamberto Zannier, do të prezantoj sot në Këshillin e Sigurimit të OKB-së një pasqyrë të plotë dhe të balancuar të gjithë situatës në Kosovë, ka thënë zëdhënësi i UNMIK-ut Rusell Geekie.

Zëdhënësi Geekie i ka thënë Radio Kosovës se përfaqësuesi i OKB-së në Kosovë ka marrë informacionet e nevojshme nga të gjitha segmentet e sigurisë në Kosovë, përfshi edhe ato për hetimet rreth ngjarjeve të fundit në Mitrovicë.

“ Zannier ka qenë i thirrur nga zëvendëssekretari i përgjithshëm i OKB-së për operacione paqeruajtëse. Unë ende nuk kam informacione, do të duhet të presim deri në mëngjes, sipas orës lokale të New Yorkut, për t’u siguruar rreth formatit të mbledhjes dhe rreth përfaqësuesve tjerë që do të jenë prezent. Por ju siguroj se zoti Zannier do të mbaj një fjalim të balancuar në këtë mbledhje”, ka thënë Geekie.

Zëdhënësi Geekie, ka thënë se nuk di akoma nëse në Këshillin e Sigurimit do të flas edhe ministri i jashtëm i Kosovës Skender Hyseni. Për këtë ka qenë e pamundur të merret ndonjë përgjigje edhe nga zyrtarë të qeverisë së Kosovës.

Seanca e Këshillit të Sigurimit të Kombeve të Bashkuara është kërkuar nga shteti serb pas vrasjes së një personi dhe plagosjes së 11 të tjerëve javën e kaluar . Ndërkohë që prezantimi i situatës në Mitrovicë do të përfshijë edhe rastin e së hënës së plagosjes së deputetit serb të Kosovës petuar Miletiq.

Me 31 korrik gjithashtu do t’i paraqitet Këshillit të Sigurimit raporti i rregullt i Sekretarit të Përgjithshëm, Ban ki Moon, mbi zhvillimet në tremujorin e fundit në Kosovë.