Bruksel, 8 korrik – Parlamenti Evropian ka miratuar sot me shumicën e votave një rezolutë për Kosovën me të cilën ftohen pesë vendet e BE-së që edhe ato ta njohin pavarësinë e Kosovës.
Rezoluta, në të cilën theksohet se Parlamenti Evropian do të përshëndeste hapin sikur të gjitha vendet anëtare të BE-së të njohin pavarësinë e Kosovës, ka marrë 455 vota deputetësh, ndërsa 150 kanë qenë kundër.
“Kosovën e kanë njohur shtet të pavarur 22 anëtare të BE-së, derisa 5 ende nuk e kanë bërë këtë. Që politika evropiane të jetë më efikase në të mirë të të gjithëve në Kosovë, anëtarët e BE-së do të duhej të forcojnë qasjen e përbashkët ndaj Kosovës”, theksohet në rezolutën që e ka përgatitur deputetja austriake nga radhët e të gjelbërve, Ulrike Lunacek. Kjo rezolutë është miratuar në mbledhjen e Këshillit për Politikë të jashtme të Parlamentit Evropian, me 45 vota për, 14 kundër, dhe 2 abstenime.
Gjatë debatit të djeshëm rreth kësaj rezolute shumica e deputetëve kanë përshëndetur këtë qasje ndaj çështjes së Kosovës, ndër të cilët disa kanë theksuar se “BE tash 20 vjet po lufton për lirinë dhe të drejtat e banorëve të Kosovës”.
Por, ka pasur edhe deputetët që e kanë kundërshtuar një qëndrim të tillë, duke përmendur shpalljen e njëanshme të pavarësisë së Kosovës dhe shkeljen, sipas tyre, të rezolutës 1244 të KS të KB-së.
Komisioneri evropian për zgjerim, Stefan Fule, i cili ka hapur debatin ka thënë se anëtarët e BE-së kanë pikëpamje të ndryshme ndaj pavarësisë së Kosovës, por duhet të punojnë bashkërisht për përmirësimin e situatës atje.
Në rezolutë thuhet se njohja e pavarësisë së Kosovës për Beogradin “nuk është në këtë moment opsion i zbatueshëm politik”, por se autoritetet e Serbisë ftohen të jenë “pragmatike kundruall çështjes së statusit dhe të përmbahen nga bllokimi i anëtarësisë së Kosovës në organizatat ndërkombëtare”.
“Mendimi i Gjykatës Ndërkombëtare të Drejtësisë rreth legalitetit të shpalljes së pavarësisë së Kosovës nuk duhet të hamendësojë askënd në përkushtimin për bashkëpunim ndërkufitar, rajonal dhe lokal, meqë është në interesin më të mirë të gjithë popullsisë në Kosovë dhe në rrethinë”, theksohet në rezolutë.
Me një amendament, në rezolutë është përfshirë edhe dënimi i ashpër i sulmit me bombë në demonstruesit serbë në pjesën veriore të Mitrovicës dhe sulmi në deputetin serb në parlamentin e Kosovës, Petar Miletiç.
Në rezolutë poashtu bëhet thirrje për ndërmarrjen e të gjitha hapave me qëllim të liberalizimit të vizave dhe nga Komisioni Evropian kërkohet që për këtë qëllim “pa shtyrje të vendosen komunikimet me Prishtinën”.
Nga autoritetet e Kosovës kërkohet të bëjnë përparime në reformat kryesore siç janë lufta kundër korrupsionit dhe krimit të organizuar, decentralizim, reforma e administratës dhe theksohet “brengosja e jashtëzakonshme për shkak të dukurisë së korrupsionit, e cila, krahas krimit të organizuar mbetet një nga problemet më të mëdha në Kosovë”.
Si shkak për brengosje, në rezolutë theksohet edhe çështja e veriut të Kosovës, ku është e pranishme mungesa serioze e sundimit të ligjit, presionit dhe frikësimit e shoqërisë qytetare ndaj të cilave bëjnë grupet radikale dhe krimi i organizuar, kështu që nga EULEX-i kërkohet që në këtë rajon të forcojë përpjekjet.
Në rezolutë theksohet se Kosova ende nuk është në situatë të sigurojë kushte përkatëse për reintegrimin e romëve refugjatë të kthyer forcërisht dhe nga vendet anëtare të BE-së kërkohet të ndërkrehet riatdhesimi i tyre.
Në rezolutën e PE-së për Shqipërinë shprehet keqardhja për ngërçin politik, ndërsa mazhorancës dhe opozitës i kërkohet që të gjejnë një zgjidhje për krizën.
Pas miratimit të saj, disa minuta më vonë në parlamentin shqiptar, kryeministri Sali Berisha përshëndeti këtë zhvillim, , transmeton Top Channel
"Kjo rezolutë i kushtoi Kosovës dhe Shqipërisë vëmendjen më të madhe dhe shqiptarët kanë qenë të pranishëm më shumë se kurrë ne Parlamentin Evropian", tha Berisha.
Berisha garantoi se qeveria shqiptare mbetet e vendosur të ndërmarrë çdo reformë, të zbatojë çdo ligj, çdo vendim që integrimi i vendit në BE, të jetë i merituar dhe i pandalshëm.
"Parlamenti kërkon hetimin e materialeve të votimit të zgjedhjeve të 28 qershorit dhe përcakton këtë objekt hetimi të komisionit parlamentar, si dhe përmend amendamentet për zgjedhjet e ardhshme. I bëj thirrje opozitës që të nisim bashkë sa më parë shqyrtimin e materialeve të votimit", u shpreh Berisha.
Kreu i qeverisë premtoi sërish shumicën dhe drejtimin e komisionit nga opozita.
