Arsim Hoxha, djaloshi 22 vjeçar nga Zagrebi, është shpallur “Trim i javës” në Kroaci, për gjestin që ka bërë, kur ka gjetur një çantë me 20.000 euro dhe ia ka kthyer pronarit.

Ngjarja ka ndodhur në qytetin Split të Kroacisë, ku Arsim Hoxha kishte ardhur për të shikuar çerekfinalen e “Devis Cup” në tenis, ndërmjet Kroacisë dhe Serbisë.

Pas përfundimit të këtij takimi në tenis, në të cilin Kroacia ka pësuar humbje të thellë dhe ka dëshpëruar spektatorët në “Spalladium Arena” në Split, çmimin e madh për “fair play” e ka fituar djaloshi 22 vjeçar Arsim Hoxha, një simpatizues i lojës magjike të tenisit.

Duke iu referuar mediave kroate, Arsim Hoxha, pas përfundimit të takimit ndërmjet Kroacisë dhe Serbisë në tenis, në lozhat e “Spalladium Arenës”, ka gjetur çantën në të cilën kanë qenë 20.000 euro.

Anëtari i Këshillit drejtues të Federatës së tenist të Serbisë, Lluka Vujoviq, i ka humbur 20.000 euro, i emocionuar e gëzuar duke festuar fitoren e përfaqsueses së Serbisë ndaj Kroacisë. Mirëpo, ai megjithatë ka qenë fatlum, sepse paratë i ka gjetur djaloshi shqiptar nga Zagrebi, Arsim Hoxha.

“E kam vërejtur çantën, e kam marrë por nuk e kam hapur që të shoh se çfarë ka brenda. Ua kam dorëzuar hostesave të palestrës sportive, e më pas kam dëgjuar se ka pasë tre-katër mijë euro. Më vonë, më ka thirrë Lluka Vujoviq, i cili më ka ftuar të jem mysafir i tij në qytetin Pançevë, sepse i`a kam shpëtuar 20.000 euro. Më kanë ofruar shpërblim të cilin natyrisht nuk e kam pranuar”, ka deklaruar Arsim Hoxha për mediat kroate.

Pas këtij gjesti tepër njerëzor, hostesat i kanë ofruar 50 euro, duke insistuar që këtë shpërblim simbolik të pranojë në shenjë faleminderimi dhe respekti. Kryeshefi i policisë në Split, Josip Bukviq, ka deklaruar se djaloshi ka bërë një gjest tepër pozitiv, human dhe njerëzor, ndaj meriton të gjitha lavdratat.

"Respekt për veprën dhe gjestin e Arsim Hoxhës", shkruajnë mediat kroate. (INA)