Producenti serb, Zhelko Mitroviq, nuk dëshiron të bashkëpunojë me Angelina Jolie, shkruajnë gazetat serbe, të enjten.

Arsyeja, sipas tyre, qëndron në atë se në filmin e ri ku do të luajë aktorja me nam, serbët paraqiten si djem të këqij, të cilët përdhunojnë dhe vrasin myslimanët.

“Menaxhmenti i grupi mediatik ‘Pink’ është takuar me katër producentët e ekipit të aktores së njohur që të bisedojnë rreth bashkëpunimit eventual në realizimit e një filmi, i cili do të duhej të xhirohej pjesërisht në Serbi dhe në territorin e Bosnjë Hercegovinës.

Mirëpo, pasi pronari i ‘Pinkut’ u njoftua detajisht me skenarin, ai këtë bashkëpunim e refuzoi, pa marrë parasysh që kompania e tij nga kjo punë do të përfitonte shumë në biznesin e filmit”, shkruan e përditshmja “Vecernje Novosti”, teksa citon Mitroviqin. “Kam pasur shumë simpati për Angelina Jolie dhe shumë e kam respektuar personalitetin dhe veprimtarinë e saj. Por ajo është përplot paragjykime për serbët.

E di që bashkëpunimi me të hap shumë dyer të biznesit të madh të filmit, por nuk dua të jem pjesë e diçkaje që kush e di për të satën herë i paraqet serbët si djem të përhershëm të këqij. Nuk dëshiroj dhe nuk dua”, citohet të ketë thënë Mitroviq.

Tanja Vojtehovski, përfaqësuese e “Pink International” ka zbuluar disa detaje të skenarit të filmit të ri. Sipas saj, siç raportojnë mediat serbe, “realizimi i filmit është i vendosur në territorin e ish- Jugosllavisë në kohën e dhunës gjatë luftës, kurse populli serb paraqitet në konotacion negativ, në krahasim me myslimanët”.

“Mitroviq, e as kompania e tij, nuk kanë dëshiruar të jenë pjesë e projektit, edhe pse të gjithë bashkë kishim përfituar nga kjo“, ka thënë kjo përfaqësuese e “Pink Internacional“

Në njoftimin e PFI-së thuhet se Mitroviq ka vendosur që në asnjë mënyrë të mos marrë pjesë në këtë projekt “pa marrë parasysh gjerësinë e projektit dhe shanseve që të vendoset bashkëpunimi me aktoren më të njohur dhe më të kërkuar në botë, që patjetër do ta rendiste kompaninë PFI në shtëpitë botërore të produksionit”.