Tiranë, 19 korrik - Prej kohësh lidhja e tyre ka zënë faqet e para në gazetat rozë, por është parë gjithmonë në kuadrin e një thashethemi. Së fundmi, këngëtari i njohur Adrian Gaxha dhe vajza simpatike e ekranit Luana Vjollca, po e shfaqin gjithnjë e më shumë edhe në publik, faktin se janë të dashuruar. Pas publikimit përpara një viti të një fotoje në të cilën çifti ishte bashkë në një nga pubet e kryeqytetit, filluan dyshimet se mes tyre mund të kishte diçka më shumë se sa thjesht miqësi, ndonëse ata nuk e pranuan.

Sipas Ballkanweb, me kalimin e kohës kjo histori u harrua, dhe që të dy u bënë pjesë e historive të tjera rozë. Pa kaluar shumë kohë, ata shfaqen sërish bashkë, shkruajnë në faqet e njëri-tjetrin në “Facebook” deklarata të përzemërta dashurie, duke na bërë ne të kuptojmë se tanimë ata janë sërish të lumtur bashkë. Komenti i fundit është bërë nga Adriani në faqen e Luanës në të cilin shkruhet: “Jam fansi yt më i çmendur!!!! Të dua!!!”. Pas kësaj deklarate të ngrohtë nuk mund të mungonte as përgjigja e Luanës, e cila shkruan: “Të dua dhe unë tyyyy!!!...” Menjëherë pas tyre, kanë vërshuar edhe komentet e fansave. Të jetë kjo një shaka miqësore mes të dyve, apo vërtetë ata janë një çift në jetë?!