Paris, 21 korrik - Ndërsa klientët e pasur dremisnin në klasën biznes të avionëve të kompanisë “Air France”, stjuardesa përfitonte për të futur duart në xhepat e bagazheve të tyre.
Ka përfunduar me një fund të hidhur karriera e punonjëses së kompanisë ajrore franceze Lucy R., e cila që nga marsi 2009 ka vjedhur dhjetëra pasagjerë të huaj.

Sipas gazetës “Le Figaro”, 47 vjeçarja është arrestuar të premten nga policia franceze në aeroportin “Paris-Charles-de-Gaulle”, ndërsa po zbriste nga një avion i kthyer nga Tokio, transmeton TCH. Ka qenë pikërisht kjo linjë ku ajo ka kryer vjedhjet më të mëdha dhe, pas ankesave të shumë pasagjerëve japonezë, policia ra në gjurmët e hajdutes.

“Japonezët janë preja ideale, pasi udhëtojnë me shumë para me vete, sepse nuk dëshirojnë të paguajnë me karta krediti”, tha një drejtues i policisë. Gjithsesi, Lucy mund të kalojë vetëm një periudhë të shkurtër në burg, pasi ka pranuar vjedhjet, duke u justifikuar se kishte nevojë për para.