Ne të Bluetooth, u gjendëm krejt rastësisht në Durrës në fundjavën e kaluar, pikërisht më datën 29 gusht, kur këngëtarja shqiptare Rovena Stefa organizonte shown e fundit të saj të mbylljes së sezonit veror të këtij viti, duke përshëndetur kosovarët nga Peja, Gjakova, Prishtina, Prizreni… e duke kënduar vetë Rovena, në klubin e saj, live për të gjithë ata që do të linin pushimet.
E ta merrte mendja, se për një këngëtare si Rovena, klubi do të ishte mbushur plot me njerëz. Por sa hyje te një portë e sajuar, ku të priste e motra e Rovenës, të shfaqej një vend gjigand, me postera të Rovenës gjithandej, por që gjithë e gjithë brenda klubit, ishin vetëm nja 20 a 30 vetë.
Epo ndoshta me kohën do të vinin, dhe ky ishte mendimi i parë që të vinte në mend. Rovena këndonte e këndonte pa pushim, këngë nga Shqipëria e këngë nga Kosova, por askush nuk dukej te porta. Dhe me vete pyet se pse. Por sa përfundon birrën e parë, kërkon faturën: e c’të shohësh, një birrë te klubi i Rovenës kushton jo pak, por plot 7000 lekë. Ajo birra që me shumicë e me arka merret nga 700 lekë, te Rovena kushtonte 7000 lekë.
Ndaj shihje të ata pak vetë që ishin aty, e që normalisht nuk mbanin ramazan, të pinin ujë, e coca cola, e rrallë, ndonjëri prej tyre birrë. Ja pra ku e kuptoje menjëherë se çfarë kishte ndodhur me shoën e dështuar të Rovenës, që askush nuk e di pse kishte vendosur këtë sezon të abuzonte me çmimet. Sigurisht, dikush do të thotë se është lokali i saj, zgjedhje e këngëtares, dhe kush do ta dëgjojë live duke kënduar, do të duhet të pranonte edhe çmimet e kripura të klubit. Por njerëzit, që sot nuk janë “budallenj” e kishin bërë zgjedhjen e tyre. Thjesht, kishin bojkotuar klubin, dhe nuk e kishin begenisur këngëtaren. Vallë, do të aplikojë të njëjtën skemë Rovena edhe vitin që vjen? Këtë do ta shohim, por klubi i saj, ishte vendosur mirë, bash në qendër të plazhit të Durrësit.