Ministri i Republikës së Kosovës, Skënder Hyseni gjatë një ligjërate të mbajtur në Universitetin e New York-ut tha se Gjykata Ndërkombëtare e Drejtësisë ka vënë qartë në spikamë rrethanat faktike dhe ligjore që janë të veçanta për Kosovën, ndërsa ka vlerësuar se Kosova është e gatshme që të bashkëpunojë me Serbinë për çështje praktike të interesit të ndërsjellë, mbi bazën shtet me shtet.
Në ligjëratën me temë “Konsolidimi ndërkombëtar i shtetësisë së Kosovës: Implikimet praktike të Mendimit të Gjykatës Botërore”, ministri i Jashtëm ka folur për punën që është bërë dhe përpjekjet që po bëhen në drejtim të konsolidimit të plotë të shtetësisë së Kosovës.
Shefi i diplomacisë kosovare po ashtu ka bërë një paraqitje të kontekstit relevant që ka çuar në krijimin e shtetit të Kosovës, duke rikujtuar dhe përshkruar momentet nga Konferenca e Rambujesë, ndërhyrja e NATO-s, miratimi i rezolutës 1244, administrimi ndërkombëtar, e deri në punën, përpjekjet dhe perspektivat aktuale për përshpejtimin dhe intensifikimin e njohjeve dhe të anëtarësimit në mekanizma ndërkombëtarë.
“...Në vijim të Mendimit, Asambleja e Përgjithshme ka miratuar rezolutën A/64/L.65/Rev.1, e cila ka mirëpritur Mendimin e Gjykatës Botërore. Teksti i rezolutës është hartuar nga Bashkimi Evropian dhe bashkë-sponsorizuar nga Republikën e Serbisë, e cila është detyruar që të tërheqë projektrezolutën të cilën e ka paraqitur më parë, e që ishte një draft çorientues dhe paraqiste një kritikë të papranueshme për vetë organin kryesor gjyqësor të Kombeve të Bashkuara”, ka thënë Hyseni.
Ai ka vlerësuar se mendimi i qartë i Gjykatës se Deklarata e Pavarësisë së Kosovës është në pajtim me të drejtën ndërkombëtare dhe mirëpritja e Mendimit nga organi politik që e ka kërkuar këtë Mendim, pra Asambleja e Përgjithshme, konfirmon se nuk ka asnjë arsye ligjore dhe politike për shtetet që ende nuk e kanë njohur Kosovën, që të vonojnë më tej njohjen e tyre.
Hyseni ka përmendur marrëdhëniet e mira fqinjësore dhe diplomatike që Republika e Kosovës ka ndërtuar me të gjithë fqinjët e saj, përveç Republikës së Serbisë, ndërsa për këtë arsye është shprehur ministri, Republika e Kosovës ka mirëpritur gatishmërinë e Bashkimit Evropian për të lehtësuar një proces dialogu ndërmjet Republikës së Kosovës dhe Republikës së Serbisë për të promovuar bashkëpunimin ndërmjet dy shteteve.
Ligjërata e ministrit Hyseni në Universitetin e New York-ut është sponsorizuar nga Qendra Alexander Hamilton dhe Departamenti i Politikës pranë këtij Universitetit.
