Ministri i Punëve të Jashtme, Skënder Hyseni gjatë qëndrimit në New York, në margjina të sesionit plenar të Asamblesë së Përgjithshme ka marrë pjesë në një pritje të Organizatës së Konferencës Islamike, ndërsa në komunikimet që ka pasur me përfaqësuesit nga shtetet që ende nuk e kanë marrë vendimin për njohje, ka vënë theksin te zhvillimet më të fundit rreth Kosovës, me të cilin rast u ka bërë thirrje edhe njëherë për njohjen e shtetit.
Me këtë rast, ministri Hyseni ka takuar një numër ministrash të jashtëm dhe përfaqësuesish të tjerë të lartë nga shtetet anëtare të OKI-së, si dhe me vetë Sekretarin e Përgjithshëm të kësaj organizate 57-anëtarësh, Ekmeleddin Ihsanoglu.

Ministri me këtë rast ka takuar ministren e Jashtme të Bangladeshit, Dipu Moni, ministrin e Jashtëm të Iranit, Manouchehr Mottaki, ministrin e Jashtëm të Sirisë, por edhe një numër përfaqësuesish nga vende që tashmë e kanë njohur Kosovën, si me presidentin e Somalisë, ministrin e Jashtëm të Gambisë, ministrin e Jashtëm të Afganistanit, ministren e Jashtme të Sierra Leone-s.

Në njoftimin e Ministrisë së Punëve të Jashtme, po ashtu bëhet e ditur se Hyseni është takuar edhe ministrin e Punëve të Jashtme të Dominikës (Commonwealth of Dominica), Alvin Bernard. Ky takim është zhvilluar në vazhdën e takimeve dhe të komunikimeve intensive me përfaqësues të shteteve të Komunitetit të Karaibeve (CARICOM), dhe në përpjekje për të bindur shtetet që ende nuk e kanë njohur shtetin e Kosovës, ta bëjnë këtë sa më parë.

Ndërsa, i ashtuquajturi ministri i Shtetit në Ministrinë e Jashtme të Dominikës, Alvin Bernard, e ka siguruar kreun e diplomacisë kosovare se Qeveria e tij do t’i kushtojë vëmendjen e merituar kërkesës për njohje dhe se, në kohën e duhur, do të merret vendimi.