Organizata e Veteranëve të Luftës së Ushtrisë Çlirimtare të Kosovës nëpërmjet një letre të hapur ka kërkuar nga Kryesia e Kuvendit të Kosovës, që pavarësisht zhvillimeve politike të mos zvarritet edhe më tej Ligji për kategoritë e luftës, por të miratohet dhe të fillojë të zbatohet nga 1 janari i vitit 2011.

Me një letër drejtuar Kryesisë së Kuvendit të Kosovës, Komisionit për Legjislacion dhe Shefave të grupeve parlamentare, OVL e UÇK-së ka shprehur shqetësimin e saj për mos procedimin me kohë të Projektligjit për kategoritë e luftës.

“Kemi përcjell me vëmendje, diskutimet rreth Projektligjit për statusin dhe të drejtat e familjeve të dëshmorëve, invalidëve, veteranëve dhe pjesëtarëve të UÇK-së dhe familjeve të viktimave civile të luftës. Duke e parë se koha po ecën, ndërsa projektligji ende nuk u procedua në seancë parlamentare, ne shprehim shqetësimin e thellë, për mënyrën e trajtimit dhe diskutimit të projektligjit, në emër të të gjithë anëtarësisë që ne e përfaqësojmë si organizatë”, thuhet në reagimin e OVL të UÇK-së.

Kjo organizatë ka kërkuar nga Kryesia e Kuvendit, Komisioni për Legjislacion dhe shefat e grupeve parlamentare, që puna rreth projektligjit të përshpejtohet dhe të mos politizohet, në mënyrë që i njëjti të vihet në zbatim nga 1 janari 2011.

“Edhe pse jemi të vetëdijshëm për situatën politike në Kosovë, ne nuk pranojmë asnjë justifikim që do të vononte miratimin në tërësi të projektligjit, apo shtyrjen e afatit të hyrjes së tij në fuqi”, theksohet nga organizata e luftës çlirimtare.

Sipas OVL të UÇK-së, çdo shtyrje e mëtutjeshme, do të konsiderohet si hipokrizi politike, mos respekt ndaj luftës çlirimtare të UÇK-së dhe veteranëve në përgjithësi dhe se durimit tashmë i ka ardhur fundi.

Ndër të tjera, OVL e UÇK-së ka shfaqur shpresën që nuk do të ketë asnjë vonesë, megjithatë akne paralajmëruar se janë duke i diskutuar format dhe mënyrat e veprimeve të mëtutjeshme