Banorët e fshatit Suhadoll në veri të Mitrovicës, kanë protestuar të premten për shkak të një vendimi të UNMIK-ut që ka të bëjë me ndërtimin e 9 shtëpive për familjet rome nga kampet e veriut në këtë fshat.

Përfaqësuesi i banorëve të këtij fshati, Shefki Imeri tha se banorët e Suhadollit nuk do të lejojnë që stafi i UNMIK-ut në pjesën veriore të vendos për ndërtimin shtëpive rome në këtë fshat, sepse ato hapësira ku UNMIK-u është duke shikuar, janë prona të banorëve të Suhadollit të cilat u janë marrë me dhunë në vitet e 60-ta.

“Mos të keqkuptohemi, nuk janë në pyetje romët, por ne nuk do të lejojmë të ndërtohet asgjë sepse është pronë e banorëve të Suhadollit. Në vitet 60 kjo pronë është marrë me dhunë, prandaj ne këtë pronë patjetër duhet ta kthejmë”, ka thënë Imeri.

Ndërkaq banorët në Suhadoll kanë kërkuar edhe mbështetjen e komunës së Mitrovicës, për të cilën i ka siguruar zëvendës kryetari Riza Haziri, i cili ishte në vend ngjarje.

Ai tha se komuna e Mitrovicës e kundërshton një gjë të tillë dhe se pa vendimin e kryetarit te Komunës nuk mund të merret asnjë vendim.

“E dimë të gjithë që është bërë mjaft për romët edhe është duke u bërë akoma. Komuna e ka dhënë pjesën më elite të tokës në qytet dhe ne jemi për kthimin e atyre romëve të cilëve u janë djegur pronat. Andaj, komuna e kundërshton një gjë të tillë, dhe ju duhet të keni besimin tonë dhe njëherit të jeni shumë të matur në marrjen e vendimeve”, ka thënë Haziri.

Po ashtu, zyrtarët komunalë janë shprehur se kanë biseduar edhe me përfaqësuesin e lagjes së romëve në Mitrovicë dhe se ky i fundit ka thënë se nuk janë të interesuar për ndërtim në atë vend, pasi ajo ka qenë vetëm një ofertë e UNMIK-ut.