Përderisa përmendet tetori si muaj për fillimin e raundit të parë të bisedimeve me Serbinë për të vazhduar me raundin e dytë pas zgjedhjeve të reja në Kosovë, ushtruesi i detyrës së presidentit të vendit, Jakup Krasniqi përsërit qëndrimin e tij se bisedimet duhet të zhvillohen vetëm pas konsolidimit të institucioneve të dala nga zgjedhjet e reja.

Krasniqi ka thënë të martën se Kosova ka qenë e përgatitur për bisedime me Serbinë, njësoj siç ka biseduar edhe me vendet tjera fqinje, por për të qenë bisedimet stabile, sipas tij, ato duhet të ndodhin pas zgjedhjeve në Kosovë.

Krasniqi: Bisedimet të zhvillohen kur Kosova t’i ketë institucionet e konsoliduara
(Video)
“Unë mendoj që për të qenë bisedimet më stabile, Kosova mund të themi se është në fushatë zgjedhore dhe për të mos u përdorur fushata zgjedhore shumë me çështjet e kësaj natyre, do të ishte në interes edhe të politikës edhe të atyre që duhet t’i mbikëqyrin këto bisedime, që bisedimet të zhvilloheshin kur Kosova t’i ketë institucionet e konsoliduara, të dala nga zgjedhjet e reja, të lira dhe të drejta”, është shprehur Krasniqi.

Ndonëse data e zgjedhjeve të parakohshme vazhdon të mbetet ende enigmë për opinionin, përderisa konsultat e Krasniqit me krerët e partive politike vazhdojnë.
Mediat kanë raportuar se data e zgjedhjeve do të shpallet brenda kësaj jave, mirëpo Krasniqi këtë nuk ka dashur të komentojë, duke thënë se nuk ka çka t’i shtojë asaj që ka thënë dje.

Të hënën ushtruesi i detyrës së presidentit ka thënë se data e mbajtjes së zgjedhjeve do të caktohet shumë shpejt dhe brenda afatit kushtetues.

Nga ana tjetër, Krasniqi nuk është i informuar as për mundësinë e zgjedhjes së presidentit të ri të vendit, për të cilin është thënë se LDK-ja do të dalë brenda javës me propozimin e emrit për president.

Krasniqi: Nuk jemi të informuar
(Video)
“Nuk jemi të informuar për këtë. Gjithçka që është në kuadër të kushtetutës për neve është e pranueshme dhe ka mundësi të realizohet”, ka thënë Krasniqi.

Ndryshe, kryeparlamentari Krasniqi ka zhvilluar një sërë takimesh me përfaqësuesit e partive parlamentare dhe jo parlamentare për të biseduar lidhur me zgjedhjet e parakohshme, ndërkohë që sipas tij, shumica e partive janë kundër propozimit që zgjedhjet të mbahen brenda këtij viti./B.Lani/