Nxënësit e shkollës së mesme të ultë “Jusuf Gërvalla” në fshatin Dumnicë, tash e tutje do të mësojnë me inventarë të ri e tejet modern, si nyje sanitare të rregulluara, ngrohje qendrore, dritare të reja dhe fushë sporti, në saje të ndihmës së ardhur nga bamirësit e komunës Kerkade të Holandës.

Mehdi Dibrani, banor i fshatit Dumnicë, ka 45 vite që jeton në komunën Kerkade të Holandës dhe me iniciativat e tij që para 7 vitesh, kanë filluar të arrijnë ndihmat e konsideruara për komunën e Vushtrrisë, veçanërisht vendlindjen e tij.

Ai dhe miku i tij ish- udhëheqës i arsimit në këtë komunë, holandezi Nico Rinkens edhe këtë vit në Vushtrri kanë sjell ndihma humanitare, kryesisht inventar shkollor.

“Bashkë me mikun Nico Rinkens, kemi sjell një maunë me ndihma humanitare të dedikuara për shkollën e mesme të ultë “Jusuf Gërvalla”, tha Dibrani.

Ai bëri të ditur se ndihma ka të bëjë kryesisht me inventar shkollor dhe veshmbathje, ku janë të përfshira 240 banka shkollore, 300 karrige për nxënësit e kësaj shkolle dhe 150 tjera për fshatin, pastaj 14 dërrasa të zeza, tre pjesëse dhe lëvizëse, një karrige stomatologjike, si dhe 20 paketime të mëdha të veshmbathjes.

Ndërkaq holandezi Nico Rinkens tha se do të vazhdojë të ndihmojë edhe në të ardhmen komunën e Vushtrrisë dhe arsimin në Kosovë.

“Jam për herë të pestë në aksione të tilla humanitare në Kosovë dhe ndjehem shumë i gëzuar për mundësinë që më ofrohet të ndihmoj”, u shpreh ai.

Ndryshe, në saje të ndihmës së arritur nga kjo komunë në shumën prej 50 mijë eurove, shkollës iu kanë ndërruar dritaret, instaluar ngrohja qendrore, rregulluar fusha e sportit dhe nyjet sanitare.

Nënkryetarja e komunës së Vushtrrisë, Xhevahire Izmaku ka falënderuar dy humanistët për ndihmat humanitare, posaçërisht drejtuesit e pushtetit lokal të komunës Kerkade./A.Damati/