Prishtinë, 16 tetor - Aleanca Kosova e Re, e cila asnjëherë nuk është deklaruar se është kundër privatizimit, është pozicionuar kundër privatizimit në këtë formë të Postë-Telekomit të Kosovës, duke konsideruar se nuk mund të shkohet në privatizim të këtij aseti shumë të çmuar pa u bërë paraprakisht vlerësimi i drejtë, ka deklaruar të shtunën, në një konferencë për media, Ibrahim Makolli, shef i Grupit parlamentar të AKR-së.
Ai ka theksuar se qëndrimi i AKR-së përkitazi me privatizimin e PTK-së ka qenë dhe vazhdon të jetë i qartë.
“Dua të jem i qartë, sepse nganjëherë me apo pa qëllim po shtrembërohen qëndrimet tona në publik. AKR asnjëherë nuk është deklaruar se është kundër privatizimit, sepse koncepti ynë politik është shumë i qartë, për liberalizim të ekonomisë, por është deklaruar kundër formës së privatizimit”, tha Makolli, raporton KosovaLive.
Por, AKR është pozicionuar kundër privatizimit në këtë formë të PTK-së, ngase konsiderojmë se nuk mund të shkohet në privatizim të këtij aseti shumë të çmuar pa u bërë paraprakisht vlerësimi i drejtë”, ka nënvizuar Makolli.
Ai gjithashtu ka shtuar se AKR vlerëson se nuk është veprim i mençur privatizimi në këtë kohë të krizës globale financiare, ngase edhe kompanitë e interesuara tashmë në këtë krizë nuk ofrojnë ofertë të kënaqshme. Gjithashtu ka vërejtur se në asnjë vend institucionet në fund të mandatit nuk ndërmarrin vendime strategjike, prandaj e vlerësojmë se këto institucione nuk e kanë të drejtën për veprime të tilla strategjike.
Përkitazi me veprimet në seancën e fundit të Kuvendit të Kosovës, ku pretendohet se ka kaluar strategjia e Qeverisë për privatizimin e Postë-Telekomit, Makolli ka nënvizuar se në atë mbledhje e ka bërë shumë të qartë qëndrimin e AKR-së kundër privatizimit të PTK-së, “për faktin se në vazhdimësi kemi shprehë kundërshtimin tonë për formën dhe modalitetet e privatizimit”.
Ai ka shtuar se kryetari i Kuvendit në mënyrë të kundërligjshme e ka vënë në votim strategjinë, sepse për debat kanë qenë të paralajmëruar edhe 14 deputetë dhe është dashur së pari të përfundojë debati dhe pastaj të vihet në votim.
“Në momentin kur kryetari i Kuvendit, në mënyrë të kundërligjshme e ka vënë në votim, shumica e deputetëve, e kanë lëshuar sallën, me çka është pamundësuar votimi për shkak të mungesës së kuorumit, e që është në kundërshtim edhe me Rregulloren e Kuvendit e edhe me Kushtetuten. Pra, si i tillë vendimi është i kundërligjshëm dhe i papranueshëm”, ka theksuar Ibrahim Makolli, në këtë konferencë për media.
